ԵԱՀԿ գործող նախագահ, Հունաստանի արտաքին գործերի նախարար Դորա Բակոյանիսը հայտարարեց, թե հույս ունի, որ ԼՂՀ հակամարտության կարգավորման հարցում առաջընթաց կբերի Մոսկվայում Հայաստանի և Ադրբեջանի նախագահների հերթական հանդիպումը։
«Մենք, անշուշտ, գործակցում ենք հակամարտության կարգավորման՝ ԵԱՀԿ Մինսկի խմբի ջանքերին և բաց ենք դրա համար։ Հույս ունեմ, որ Հայաստանի և Ադրբեջանի նախագահների հանդիպումը Մոսկվայում առաջընթաց կգրանցի այդ հարցում»,- ուրբաթ Երևանում կայացած մամուլի ասուլիսի ժամանակ հայտարարեց Բակոյանիսը:
Ադրբեջանական ԶԼՄ-ների տարածած հաղորդագրության համաձայն, Ադրբեջանում Ռուսաստանի դեսպան Վլադիմիր Դորոխինը հայտարարել է, որ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը տեղի կունենա Մոսկվայում հուլիսի կեսին։
Ըստ նրա, նախագահների հանդիպումը տեղի կունենա «Ձիարշավ Ռուսաստանի Դաշնության նախագահի մրցանակի համար» միջազգային ոչ ֆորմալ միջացառման ընթացքում։ Վերջին անգամ Ալիևն ու Սարգսյանը հանդիպել են հունիսի 4-ին Սանկտ Պետերբուրգում։
Բակոյանիսն ընդգծեց, որ նախագահների վերջին հանդիպումը Սանկտ Պետերբուրգում շատ օգտակար էր։ Միևնույն ժամանակ ԵԱՀԿ գործող նախագահը հավաստիացրեց, որ կազմակերպությունը ջանք չի խնայի խնդրի կարգավորման և «տարածաշրջանում կյանքերի պահպանման» համար։
«Մարդկային ամեն կյանք մեզ համար մեծ արժեք է ներկայացնում»,- հայտարարեց Բակոյանիսը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
