ԵՐԵՎԱՆ, 2 հուլիսի. /Նովոստի-Արմենիա/. ՀՀ ԿԳ նախարար Արմեն Աշոտյանը հինգշաբթի հանդիպեց հանրապետական մամուլում «Հայոց լեզու և գրականություն» առարկայի միասնական քննության թեստի վերաբերյալ բաց նամակով հանդես եկած մասնագետներին՝ ԵՊՀ դասախոսների և ավելի քան 30 ուսուցչի, «Նովոստի-Արմենիա» գործակալությանը հայտնեցին ՀՀ Գիտության և կրթության նախարարությունից։
«Այս շրջանում ուշադրության կենտրոնում ենք պահել մամուլում ու ծնողների հետ հանդիպումների ընթացում հնչած բոլոր տեսակետները։ Մենք փորձելու ենք դրանք ի մի բերել քննական մարաթոնի ավարտից հետո, երբ սեպտեմբերին կանդրադառնանք համակարգի կազմակերպչական ու բովանդակային խնդիրների քննարկմանը»,- ողջունելով հյուրերին՝ ասաց նախարարը։
Ըստ նրա, չնայած հանրության շրջանում առկա որոշ դժգոհություններին, միանշանակ է, որ նոր քննական համակարգը կայացման ճանապարհին է, և պետք է աշխատել դրա կատարելագործման ուղղությամբ։
«Հայոց լեզու և գրականություն» առարկայի թեստի առնչությամբ մամուլի հրապարակումներից գերատեսչությունն ուշադրության է արժանացրել հայեցակարգային առաջարկությունները։
Նախարարը համաձայնեց մասնագետների այն դիտարկման հետ, որ տվյալ դեպքում խնդիրը ոչ թե թեստի բարդության, կառուցվածքի կամ հեղինակային խմբի մեջ է, այլ համակարգային է։ «Միայն թեստը բարդացնելով՝ դպրոցի խնդիրը չի լուծվի. այդպես դպրոցն ընդամենն ուղղորդվում է դեպի քննությունները»,- ասացին մասնագետները։
Հանդիպման մասնակիցները միակարծիք էին նաև այն հարցում, որ մեր մասնագետները թեստաբանության տեխնոլոգիաների առումով ուսանելու շատ բան ունեն։ Անհրաժեշտ է ստեղծել նաև առաջադրանքների բանկ՝ քննական անցանկալի անակնկալներից խուսափելու համար։
Նախարարը դպրոցի ուսուցիչներին նաև վստահեցրեց, որ թեստերի մշակման ու առաջադրանքների բանկի ստեղծման գործում կընդգրկվեն ուսուցիչներ։
Աշոտյանը մասնագետներին հորդորեց բոլոր իրենց առաջարկները ներկայացնել գրավոր՝ խոստանալով անձամբ ծանոթանալ դրանց ու համակարգի հետագա բարելավման ժամանակ դրանց մի մասը կյանքի կոչել։-0-
