Հայաստանի վերաբերյալ ԵԽԽՎ վերջին №1677 բանաձևը վեհաժողովի նախորդ բանաձևերի տրամաբանական շարունակությունն է, կարծում է ՀՀ ԱԺ արտաքին գործերի մշտական հանձնաժողովի նախագահ, ՀՅԴ Գերագույն մարմնի ներկայացուցիչ Արմեն Ռուստամյանը:
«№ 1677 բաձաևը պետք է դիտել մնացած բանաձևերի հետ մեկ ընդհանրության մեջ, քանի որ դրանք մեկ շղթայի օղակներ են և միմյանց տրամաբանական շարունակությունը»,- հայտարարեց նա՝ հավելելով, որ ԵԽԽՎ այդ բանաձևերը հետընտրական քաղաքական ճգնաժամի հետևանք են:
Հունիսի 24-ին Ստրասբուրգում ԵԽԽՎ ամառային նստաշրջանում քննարկվում էր, թե ինչպես է Հայաստանը իրականացնում Վեհաժողովի կողմից ավելի վաղ ընդունված բանաձևեր կատարման գործընթացը։ ԵԽԽՎ նիստում Հայաստանի մասով ընդունվեց նոր՝ №1677 բանաձևը, որի համաձայն երկիրը կշարունակի մնալ մոնիտորինգի ներքո։
Ռուստամյանի խոսքերով, այն հարցում, որ Հայաստանի նկատմամբ պատժամիջոցներ չկիրառվեցին, կարևոր դեր խաղացին ՀՀ ՔՕ-ում ընդունված ուղղումներն ու համաներման հայտարարումը, ինչպես նաև իշխանության բարձրագույն մարմինների արձագանքը ԵԽԽՎ բանաձևերին, որոնց արդյունքում ստեղծվեցին նախագահին կից աշխատանքային խումբն ու մարտյան դեպքերի հետաքննությամբ զբաղվող ԱԺ ժամանակավոր հանձնաժողովը:
ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը: -0-
