ԵՐԵՎԱՆ, 30 հունիսի. /Նովոստի-Արմենիա/. ՀՀ նախագահ Սերժ Սարգսյանն այսօր նշում է իր 55-ամյա հոբելյանը:
Սերժ Սարգսյանը ծնվել է 1954 թ.-ի հունիսի 30-ին, Ստեփանակերտում, որտեղ ավարտել է միջնակարգ դպրոցը: 1971թ. ընդունվել է Երևանի պետական համալսարան: 1972-1974թթ. ծառայել է ԽՍՀՄ զինված ուժերում։ 1979թ. ավարտել է Երևանի պետական համալսարանի բանասիրական ֆակուլտետը:
2008թ.-ի փետրվարի 19-ին տեղի ունեցած նախագահական ընտրություններում Սերժ Սարգսյանը ընտրվել է ՀՀ նախագահ, իսկ ապրիլի 9-ին տեղի է ունեցել ՀՀ նորանշանակ նախագահի երդմնակալության արարողությունը:
1993թ.-ից Սարգսյանը տարբեր պաշտոններ է զբաղեցրել ՀՀ կառավարությունում: Զբաղեցրել է ՀՀ պաշտպանության նախարարի, պետական անվտանգության վարչության պետի պաշտոնները, այնուհետև ազգային անվտանգության նախարարի պաշտոնը: 1996-1999թթ.-ին զբաղեցրել է ՀՀ ներքին գործերի և ազգային անվտանգության նախարարի պաշտոնը, 1999թ.-ին՝ ՀՀ ազգային անվտանգության նախարարի պաշտոնը: 1999-2000թթ.-ին ղեկավարել է ՀՀ նախագահի աշխատակազմը:
2000-2007թթ.-ին զբաղեցրել է ՀՀ պաշտպանության նախարարի պաշտոնը, իսկ 2007թ.-ի ապրիլի 4-ին նշանակվել է ՀՀ վարչապետի պաշտոնում: 2007թ.-ի հունիսի 7-ին կրկին նշանակվել է ՀՀ վարչապետի պաշտոնում՝ գլխավորելով ՀՀ ԱԺ ընտրություններից հետո ձևավորված ՀՀ կառավարությունը:
2006թ.-ից Հանրապետական կուսակցության անդամ է, 2006թ.-ի հուլիսից մինչև 2007թ.-ի նոյեմբերը զբաղեցրել է Կուսակցության խորհրդի նախագահի պաշտոնը: 2007թ.-ի նոյեմբերին ընտրվել է ՀՀԿ նախագահ: Երևանի պետական համալսարանի խորհրդի և Հայաստանի շախմատի ֆեդերացիայի նախագահն է:
Սերժ Սարգսյանը ստացել է Արցախի հերոսի կոչումը, պարգևատրվել է բարձրագույն պետական պարգևներով՝ «Մարտական խաչ» առաջին աստիճանի շքանշանով, «Ոսկե արծիվ» և «Տիգրան Մեծ» շքանշաններով: Ունի կառավարական այլ պարգևներ:
1983թ.-ին Սերժ Սարգսյանն ամուսնացել է: Կինը՝ Ռիտա Սարգսյանը, ծնվել է Ստեփանակերտում, զինծառայողի ընտանիքում: Մասնագիտությամբ երաժշտության ուսուցչուհի է: Սերժ և Ռիտա Սարգսյաններն ունեն երկու դուստր՝ Անուշն ու Սաթենիկը, և մեկ թոռնիկ՝ Մարիամը:-0-
