«Արև» առաջնամագլցման բաց փառատոնը կանցկացվի Հայաստանում հուլիսի 1-ից 31-ը, որի ընթացքում մարզիկները կմագլցեն Հայաստանի այն լեռները, որոնց վրա դեռ մարդու ոտք չի եղել, ասաց «Up the rocks» ակումբի ներկայացուցիչ Մխիթար Մխիթարյանը։
Նա ասաց, որ փառատոնին կմասնակցի 15 փորձառու մագլցող Չեխիայից, ԱՄՆ-ից, Ռուսաստանից, Բուլղարիայից և Իրանից։ Նա ավելացրեց, որ փառատոն անցկացնելու գաղափարն առաջացել է Հայաստանի բնությունով հիացած օտարերկրյա ժայռամագլցողների հետ շփումից հետո։
Մխիթարյանը նշեց, որ քանի որ ժայռամագլցումը Հայաստանում բավական զարգացած չէ, հայ ժայռամագլցողների համար կկազմակերպվի առանձին վարժանք, բացի այդ, նրանք չեն մասնակցի դժվարանցանելի ժայռերի մագլցմանը։
Ըստ նրա, ժայռամագլցման փառատոնը կանցկացվի «առաջնամագլցման» ձևաչափով։ «Օտարերկրյա փորձառու մագլցողները կանցնեն այն հատվածներով, որտեղով երբևիցե որևէ մեկը չի մագլցել, և կգրանցեն արահետները քարտեզի վրա»,- ասաց Մխիթարյանը։
Իր հերթին, Հայաստանի էկոնոմիկայի նախարարության զբոսաշրջության և տարածքային տնտեսական զարգացման վարչության պետ Մեխակ Ապրեսյանը նշեց, որ փառատոնը մեծ դեր պետք է խաղա Հայաստանում այլընտրանքային զբոսաշրջության զարգացման գործում։
«Զբոսաշրջության այլընտրանքային տեսակները ներկայում շատ արդիական են և մեծ դեր են խաղում»,- նշեց նա։
Ապրեսյանը նշեց, որ այլընտրանքային զբոսաշրջությունը կարող է մեծ եկամուտ բերել Հայաստանին, քանի որ զբոսաշրջիկները բացի Հայաստանում գտնվելու ժամանակ ծախսած գումարից պետք է նաև վճարեն բնական արգելանոցային հատվածներում ժայռամագլցման իրավունքի համար։
Փառատոնի ընթացքում նախատեսվում են մագլցումներ Գառնիի և Բջնիի կիրճերի բազալտե սյուներով և Նորավանքի կիրճի ու Իջևանի լեռնաշղթայի կրաքարային ժայռերով։
Փառատոնի փակումը տեղի կունենա հուլիսի 30-31-ը Սևանի ափին։ -0-
