Հայ-վրացական բարեկամության ավանդույթները ամուր հիմք են երկրների միջև բարիդրացիական հարաբերությունների համար. Սարգսյան

Հայ-վրացական բարեկամության ավանդույթները ամուր հիմք են երկու երկրների միջև բարիդրացիական հարաբերությունների համար, ասաց ՀՀ նախագահ Սերժ Սարգսյանը՝ ելույթ ունենալով Վրաստանի նախագահ Միխայիլ Սահակաշվիլիի՝ Հայաստան կատարած պաշտոնական այցի պատվին տված ընդունելության ժամանակ։

«Մեր ժողովուրդների և մշակույթների փոխհարստացումը և բարեկամության ավանդույթները, ինչպես նաև շատ առումներով ընդհանուր պատմական ճակատագիրը ամուր հիմք են բարիդրացիական հարաբերությունների համար»,- ասաց պետության ղեկավարը:

Նրա խոսքերով, կայունության պահպանումը և ամուր խաղաղության հաստատումը Հարավային Կովկասի բոլոր պետությունների համար կենսական խնդիրներ են:

«Տարածաշրջանի ներկայիս բարդ իրավիճակում մենք մեր գործողություններում ելնում ենք հետագա սերունդների համար բարեկամության և բարիդրացիական ավանդույթների պահպանման անհրաժեշտությունից: Այլ ելք մենք չունենք»,- հայկական պետության ղեկավարի մամուլի ծառայությունից հինգշաբթի մեջբերեցին Սարգսյանի խոսքերը:

Նշելով, որ մեր ժամանակներում այնքան շատ են գլոբալ մարտահրավերներն ու սպառնալիքները, որ դրանց արդյունավետ կարելի է դիմակայել միայն միասնաբար, նախագահն ընդգծեց, որ «աշխարհագրական առումով այնքան փոքր, բայց աշխարհաքաղաքական առումով այնքան նշանակալից տարածաշրջանի, ինչպիսին մերն է, երկրները պարզապես պարտավոր են փոխադարձ հետաքրքրության ճանապարհներ փնտրել, ելնել փոխադարձ հարգանքի ու փոխվստահության նորմերից»:

Սարգսյանը նաև վստահություն հայտնեց, որ «այսօրվա հանդիպումը երկու ժողովուրդների միջև բարիդրացիական հարաբերությունների ամրապնդման խթան կհանդիսանա և նոր խթան կտա հայ-վրացական բազմակողմ հարաբերությունների հետագա խորացմանը»։

Հունիսի 24-25-ին երկօրյա պաշտոնական այցով Հայաստանում էր Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը: --0--