Հայաստանում «քաղբանտարկյալների» ազատ արձակումը Եվրախորհրդի պատժամիջոցներից խուսափելու նպատակ ուներ, հինգշաբթի լրագրողներին հայտարարեց Հայ ազգային կոնգրեսի կենտրոնական գրասենյակի կոորդինատոր Լևոն Զուրաբյանը։
«Համաժողովրդական շարժման երկարատև ու համառ պայքարի արդյունքում և ԵԽ-ի հետ համագործակցությամբ հաջողվեց հասնել «քաղբանտարկյալների» մեծամասնության ազատ արձակմանը»,- ասաց Զուրաբյանը։
Հունիսի 24-ին Ստրասբուրգում ԵԽԽՎ հերթական նստաշրջանի ժամանակ քննարկվեց Հայաստանի կողմից Վեհաժողովի ավելի վաղ ընդունած բանաձևերի պահանջների կատարման գործընթացը։ ԵԽԽՎ Հայաստանի թեմայով նիստի ընթացքում ընդունվեց նոր բանաձև, համաձայն որի՝ երկիրը կշրունակի մոնիտորնինգի տակ մնալ։
Զուրաբյանի խոսքերով՝ փաստորեն ազատվել է 28 «քաղբանտարկյալ», այդուհանդերձ, դեռևս 18 մարդ շարունակում է իր քաղաքացիական հայացքների համար բանտերում մնալ։
«Գործող ռեժիմը հնարավորություն ուներ բոլոր «քաղբանտարկյալների» ազատմամբ ազգային հաշտության հիմքեր դնել ու ընդդիմության հետ երկխոսություն սկսել, սակայն նրանց գործողությունները ցույց տվեցին, որ նրանք ազգային համախմբման միջոցով քաղաքական մթնոլորտի լիցքաթափման նպատակ չեն հետապնդում»,- ասաց նա։
ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
