Ճապոնական դեղագործական ընկերությունը ծրագրում է լյարդի բուժման դեղամիջոցի համատեղ արտադրություն հիմնել Հայաստանում

«Մինոֆագեն» /Minophagen Pharmaceutical Co./ ճապոնական դեղագործական ընկերության փոխնախագահ Տոշիցուգու Սատոն տեղեկացրել է, որ ընկերությունը մտադիր է Հայաստանում «Ստրոնգեր նեո Մինոֆագեն» դեղամիջոցի արտադրություն հիմնել, հաղորդում է ՀՀ տարածքային կառավարման նախարարության մամուլի ծառայությունը:

ՀՀ փոխվարչապետ, ՀՀ տարածքային կառավարման նախարար Արմեն Գևորգյանը չորեշքաբթի ընդունել է դեղամիջոցի ներկայացմանն ու իրացմանն ուղղված բանակցությունների անցկացման նպատակով Հայաստանում գտնվող ճապոնական դեղագործական ընկերության պատվիրակությանը:

Տեղեկատվության համաձայն՝ ընկերությունը մտադիր է դեղամիջոցի համատեղ արտադրություն կազմակերպել ՀՀ ԳԱԱ Նուրբ օրգանական քիմիայի ինստիտուտում:

«Ստրոնգեր նեո Մինոֆագեն» դեղամիջոցը լայնորեն կիրառվում է ողջ աշխարհում արդյունավետ է հեպատիտ Բ-ի և Ց-ի դեպքում լյարդի ֆունկցիոնալ խանգարումները կարգավորելու համար:

Տեղեկատվության համաձայն՝ փոխվարչապետը զրույցի ընթացքում նշել է, որ ՀՀ կառավարության և անձամբ իր համար կարևոր է առաջընթաց ապահովող ամեն մի նորույթ, առավել ևս՝ եթե դա առնչվում է մարդուն, նրա առողջությանը։

Այս առնչությամբ Գևորգյանը նշեց, որ «Մինոֆագեն» դեղագործական ընկերության նախաձեռնությունները Հայաստանում հաջողությամբ իրագործելու համար իրական նախադրյալներ կան։

Արմեն Գևորգյանը, կարևորելով ճապոնական կողմի հետ առևտրատնտեսական համագործակցության ընդլայնումը, ճապոնական կողմից կատարված յուրաքանչյուր ներդրում՝ ներկայացրել է, որ Հայաստանին մեծ աջակցություն են ցուցաբերում Ճապոնական միջազգային համագործակցության գործակալությունը (JICA), ինչպես նաև Ճապոնական Զարգացման բանկը։

Հանդիպմանը մասնակցում էին ՀՀ վարչապետի խորհրդական, ակադեմիկոս Ֆադեյ Սարգսյանը, ակադեմիկոս Ռաֆայել Մելիք¬Օհանջանյանը, ովքեր ներկայացրեցին հայ-ճապոնական գիտական կապերը։ -0-