Հայաստանի սփյուռքի նախարար Հրանուշ Հակոբյանը կարծում է, որ անհրաժեշտ է հատուկ ուշադրություն հատկացնել արևմտահայերենի՝ որպես ազգային արժեքի պահպանությանը:
«Հայոց ցեղասպանությունը վերապրած և գրեթե ամեն ինչ կորցրած հայերը ոչ միայն հաստատվեցին ու աշխատանք գտան աշխարհի տարբեր երկրներում, այլև վերականգնեցին իրենց լեզուն, մշակույթը, ավանդույթները, այդ պատճառով մենք պետք է մեծ ուշադրություն հատկացնենք արևմտահայերենին և անհրաժեշտ միջոցառումները ձեռք առնենք դրա պահպանության համար»,- երեքշաբթի լրագրողներին ասաց Հակոբյանը:
Այս կապակցությամբ նա տեղեկացրեց, որ նախարարությունը նախաձեռնել է «Հայկական հեքիաթների աշխարհ» ժողովածուի, ինչպես նաև արևմտահայերեն առակների հրատարակում:
«Հրատարակման է պատրաստվում նաև «Սփյուռքի տարեգիրքը», որտեղ հայերենով և անգլերենով կներկայացվի սփյուռքի պատմությունը»,- ասաց նա:
Բացի այդ, նախարարի խոսքերով, Երևանի պետհամալսարանում պատրաստվում են արևմտահայերենի ուսուցիչներ:
«Չեմ թաքցնի, որ սփյուռքի նախարարությունում նաև ընթանում են հայ դասական ուղղագրության դասընթացներ, քանի որ մենք պետք է ի վիճակի լինենք պատասխանել ստացված նամակներին այն ուղղագրությամբ, որով դրանք ստացվել են»,- պարզաբանեց նա: --0--
