Հայաստանում Հայկական գրատպության 500-ամյակի մեկնարկային ծրագիր կհաստատվի
ԵՐԵՎԱՆ, 22 հունիսի. /Նովոստի-Արմենիա/. Հայաստանում ծրագրվում է Հայկական գրատպության 500-ամյակի միջոցառումներին նվիրված մեկնարկային ծրագիր հաստատել, ասել է հանձնաժողովի քարտուղար, միջոցառումների համակարգող և ՀՀ նախագահի աշխատակազմի ղեկավարի տեղակալ Վիգեն Սարգսյանը:
Ինչպես «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից, նախորդ շաբաթ օրը տեղի ունեցած հանձնաժողովի երկրորդ նիստի ընթացքում Սարգսյանը ներկայացրել է նախատեսվող միջոցառումների հիմնական ուղղությունները:
«Հանձնաժողովը քննարկումների արդյունքում որոշել է միջոցառումների ծրագրի նախագիծը մեկ շաբաթվա ընթացքում նոր առաջարկություններով ու դիտողություններով համալրելուց հետո հաստատել որպես մեկնարկային ծրագիր», - ասվում է տեղեկատվության մեջ:
ՀՀ մշակույթի նախարարի տեղակալ Դավիթ Մուրադյանն իր հերթին ներկայացրել է խորհրդանիշների մրցույթի արդյունքները: Նրա խոսքերով, հոբելյանական տարվա խորհրդանիշների ստացված 8 տարբերակների միջև ընտրություն կատարելու համար որոշվել է ներգրավել մասնագիտական խումբ:
Նիստի ընթացքում քննարկվել է նաև հոբելյանական միջոցառումների շրջանակում գրքի և տպագրության միջազգային ընթացիկ միջոցառումներից որևէ մեկը Հայաստանում անցկացնելու հնարավորության հարցը:-0-
