Հայաստանի և Կալինինգրադի մարզի կրթության նախարարները քննարկեցին կրթական բարեփոխումների գործընթացը

ՀՀ կրթության և գիտության նախարար Արմեն Աշոտյանը և ՌԴ Կալինինգրադի մարզի կրթության նախարար Նատալյա Շերրին հինգշաբթի քննարկել են երկու երկրներում կրթական բարեփոխումների գործընթացները, ասվում է ՀՀ կրթության և գիտության նախարարության կայքում հրապարակված տեղեկատվության մեջ:

Հանդիպման ժամանակ Աշոտյանը նշել է, որ Ռուսաստանի Դաշնության և Հայաստանի միջև կրթության ոլորտում իրականացվող համագործակցությունը վերջին տարիներին խիստ արդյունավետ է եղել: Նա տեղեկացրել է, որ ըստ գործող միջպետական համաձայնագրի` ամեն տարի ՀՀ քաղաքացիներին ՌԴ բուհերում կրթություն ստանալու հնարավորություն է տրվում:

«Ցավոք, այս տարի հատկացված 95 տեղից օգտագործվել է միայն 24-ը, որի պատճառն, ըստ նախարարի, եղել է ինչպես տեղեկատվության պակասը, այնպես էլ առաջարկվող մասնագիտությունների ցանկը, որը հիմնականում  չի համապատասխանել մեր աշխատաշուկայի պահանջներին», - ասել է Աշոտյանը:

Նա հույս է հայտնել, որ հաջորդ տարի փորձ կարվի հստակեցնել առաջարկվող մասնագիտությունների և առկա պահանջարկի սահմանները:

Աշոտյանը ներկայացրել է նաև Հայաստանի կրթական համակարգում իրականացվող գործընթացները, որոնք միտված են կրթության որակի ապահովմանը, ինչպես նաև անդրադարձել է մասնագիտական կրթության մատչելիությանը՝ նշելով, որ բուհերի վարձավճարները շատ հաճախ հասանելի չեն սոցիալական լայն շերտերին, իսկ պետության կողմից փոխհատուցվող տեղերը սահմանափակ են:

Շերրին իր հերթին, ներկայացնելով Ռուսաստանի Դաշնության կրթության ոլորտում իրականացվող բարեփոխումները, նշել է, որ փորձի փոխանակման տեսանկյունից այսօրինակ այցելությունները կարող են լավ ավանդույթ դառնալ:

Նա ընդգծել է, որ վերջին երեք տարիների ընթացքում ՌԴ-ում, մասնավորապես Կալինինգրադի մարզում, կրթական բարեփոխումներն արդյունավետ են ընթանում, որն իր ցայտուն դրսևորումներն է գտել  հատկապես հանրակրթության ոլորտում:

«Ֆինանսավորման նոր ձևի անցումը Կալինինգրադի դպրոցներում լուծել է մի շարք խնդիրներ. դպրոցներն ավելի ինքնավար են դարձել, գումարների  վերաբաշխումն իրականացվել է` հօգուտ որակյալ կրթության», - ասել է Շերրին:

Երկու նախարարները քննարկել են նաև ոչ պետական բուհերում կրթության որակի ապահովման հարցերը: Արձանագրվել է, որ խնդիրները երկու երկրներում խիստ միանման են:

Պայմանավորվածություն է ձեռք բերվել, որ Կալինինգրադի մարզի կրթության նախարարության կողմից կներկայացվի առաջարկությունների փաթեթ` հետագա համագործակցության ընդլայնման նպատակով:-0-