Տուբերկուլոզի դեմ պայքարի խնդիրները շարունակում են մնալ ՀՀ առողջապահության նախարարության ուշադրության կենտրոնում

ԵՐԵՎԱՆ, 16 հունիսի. /Նովոստի-Արմենիա/. Տուբերկուլոզի դեմ պայքարի խնդիրները շարունակում են մնալ ՀՀ առողջապահության նախարարության ուշադրության կենտրոնում, տեղեկացնում է ՀՀ առողջապահության նախարարության պաշտոնական կայքում տեղադրված հաղորդագրությունը:

Առողջապահության նախարարությունում կայացած հերթական խորհրդակցության ժամանակ Տուբերկուլոզի ազգային ծրագրի գրասենյակի տնօրեն Արթուր Թադևոսյանը ներկայացրել է տուբերկուլոզի սովորական և դեղակայուն ձևերի տարածվածությանը, բուժմանն ու նոր բաժանմունքի բացմանն առնչվող հարցերը:

Քննարկման մասնակիցները ծանոթացել են անհրաժեշտ բժշկական միջոցների ապահովվածության մակարդակին, բուժման օպտիմալ եղանակներին ու արդյունավետ միջոցներին:

Հանդիպման ընթացքում քննարկվել են նաև մարզերից Երևան եկած հիվանդների դեղապահովումը կազմակերպելու հարցերը:

Կարևորելով բարձրացված խնդիրները և ամփոփելով հնչած կարծիքները՝ ՀՀ առողջապահության նախարար Քուշկյանը նշել է, որ անհրաժեշտ են վիճակագրական և միջազգային գործընկեր կազմակերպություններից հաշվետվական թարմ տվյալներ:

Քուշկյանն առաջարկել է ավելի ինտենսիվ աշխատել միջազգային կառույցների հետ, դրսևորել առավել ճկուն աշխատելաոճ, պատրաստել էլ ավելի հմուտ մասնագետներ, իրականացնել հսկողություն բոլոր հիվանդների նկատմամբ, ձեռնարկել միջոցառումներ հասարակական կարծիքը փոխելու ուղղությամբ:

ՀՀ առողջապահության նախարարության տվյալների համաձայն,՝ 2008 թ.-ին գրանցվել է տուբերկուլոզով հիվանդացության 1519 նոր դեպք, ինչի հետևանքով 100 հազ. մարդու հաշվարկով հիվանդների ընդհանուր թիվը կազմել է 47: Միաժամանակ տուբերկուլոզից մահանալու դեպքերի թիվը 2008 թ.-ին կրճատվել է 1,3 տոկոսով՝ կազմելով 4,3 մարդ՝ 2007 թ.-ի 5,4 մարդու համեմատ:-0-