Երկօրյա այցով Հայաստան կժամանի Սիրիայի նախագահը

Նախագահ Սերժ Սարգսյանի հրավերով չորեքշաբթի երկօրյա պաշտոնական այցով Հայաստան կժամանի Սիրիայի Արաբական Հանրապետության նախագահ Բաշար Ալ-Ասադը, հաղորդում է ՀՀ նախագահի մամուլի ծառայությունը:

Նույն օրը  ՀՀ նախագահի նստավայրում տեղի կունենա Սիրիայի նախագահի դիմավորման պաշտոնական արարողությունը, որին կհաջորդի նախագահներ Սերժ Սարգսյանի և Բաշար Ալ-Ասադի առանձնազրույցը:

Այնուհետև կկայանա պաշտոնական պատվիրակությունների ընդլայնված կազմով հանդիպումը, որից հետո կստորագրվեն միջկառավարական և միջգերատեսչական փաստաթղթեր: Հայաստանի և Սիրիայի ղեկավարները հանդես կգան համատեղ մամուլի ասուլիսով:

Հունիսի 17-ի երեկոյան ՀՀ նախագահ Սերժ Սարգսյանի և տիկին Ռիտա Սարգսյանի անունից, ի պատիվ Սիրիայի նախագահի և տիկին Ասմա ալ-Ասադի, կտրվի պաշտոնական ընթրիք:

Պաշտոնական այցի շրջանակում Բաշար Ալ-Ասադը հանդիպումներ կունենա նաև ԱԺ նախագահ Հովիկ Աբրահամյանի և վարչապետ Տիգրան Սարգսյանի հետ, կհյուրընկալվի Ն.Ս.Օ.Տ.Տ Գարեգին Երկրորդ Ամենայն Հայոց կաթողիկոսին:

Հունիսի 18-ին Հայաստանի և Սիրիայի նախագահների մասնակցությամբ տեղի կունենա հայ-սիրիական բիզնես ֆորումի բացման արարողությունը: Հայաստան այցի օրերին նախագահ Բաշար Ալ-Ասադը կայցելի նաև Մատենադարան:-0-