«Հարևանությունից դեպի գործընկերություն» խորագրով միջոցառումների շարք է նախաձեռնել Եվրասիա համագործակցություն հիմնադրամը

Եվրասիա համագործակցություն հիմնադրամը (ԵՀՀ) մի շարք հայաստանյան առաջատար հասարակական կազմակերպությունների հետ համատեղ նախաձեռնել է «Հարևանությունից դեպի գործընկերություն» խորագրով միջոցառումների շարք, որը նվիրված է Հայաստանի մասնակցությանը Եվրոպական միության ‹‹Արևելյան գործընկերություն›› ծրագրին:

Ինչպես «Նովոստի-Արմենիա» գործակալությանը հայտնեցին Եվրասիա համագործակցության հիմնադրամի մամուլի ծառայությունից, հունիսի 18-ին ԵՀՀ գրասենյակում «Հակամարտությունների կարգավորման գործընթացը Հարավային Կովկասում և Արևելյան գործընկերություն ծրագիրը» քննարկմամբ կբացվի նախաձեռնության միջոցառումների շարքը:

Միջոցառման ընթացքում կքննարկվեն ‹‹Արևելյան գործընկերություն›› ծրագրի համատեքստում հակամարտությունների կարգավորման, վստահության վերականգնման հնարավորությունները ընդհանուր հարավկովկասյան, հայ-թուրքական հարաբերությունների և Ղարաբաղի հակամարտության կարգավորման հարթություններում: Քննարկմանն ակնկալվում է ՀՀ կառավարության, Ազգային ժողովի, հայաստանյան քաղաքացիական հասարակության և ԶԼՄ ներկայացուցիչների, Եվրոպական Միության երկրների և Արևելյան Գործընկերություն ծրագրում ընդգրկված երկրների դիվանագիտական առաքելությունների ներկայացուցիչները:

«Սա բացառիկ նախաձեռնություն է, քանի որ այն միավորում է մի շարք առաջատար հասարակական կազմակերպություններ, որոնցից է Բաց հասարակության ինստիտուտը, Մարդկային զարգացման միջազգային կենտրոնը, Թրասփարենսի ինթրնեշընլը, Մշակույթի և քաղաքակրթության հետազոտման կենտրոնը և այլ, թվով տասը կազմակերպություն՝ այդպիսով ձգտելով կոալիցիոն միջոցներով Հայաստան –Եվրոպա խնդիրների քննարկումը բարձրացնել նոր մակարդակի», - ասել է ԵՀՀ տնօրեն Գևորգ Տեր-Գաբրիելյանը:

Եվրասիա համագործակցություն հիմնադրամը կոչված է հզորացնելու քաղաքացիներին` հասարակական կյանքում էական փոփոխությունների հասնելու համար: Այն Հայաստանում, Ադրբեջանում և Վրաստանում իրականացնում է կոնկրետ ծրագրեր, որոնք օգնում են մարդկանց բարելավել իրենց համայնքն ու կյանքը:-0-