Եռօրյա այցով երկուշաբթի Երևան կժամանեն ԵԽԽՎ մոնիտորինգի հանձնաժողովի համազեկուցողները

Հունիսի 15-ին եռօրյա այցով Երևան կժամանեն  ԵԽԽՎ մոնիտորինգի հանձնաժողովի համազեկուցողներ Ջոն Պրեսկոտը և Ժորժ Կոլոմբիեն, հաղորդում է Ազգային ժողովի մամուլի ծառայությունը:

Այցի ընթացքում համազեկուցողներին կընդունեն ՀՀ նախագահ Սերժ Սարգսյանը,  ՀՀ ԱԺ նախագահ Հովիկ Աբրահամյանը:

Այցի ընթացքում նախատեսված են հանդիպումներ ՀՀ ԱԺ նախագահի տեղակալ, ԱԺ 2008 թվականի մարտի 1-2 Երևանում տեղի ունեցած իրադարձությունների և դրանց պատճառների ուսումնասիրության ժամանակավոր հանձնաժողովի նախագահ Սամվել Նիկոյանի,  ԵԽԽՎ-ում ՀՀ ԱԺ պատվիրակության անդամների, ԱԺ գիտության, կրթության, մշակույթի, սպորտի և երիտասարդության հարցերի հանձնաժողովի նախագահ Արտակ Դավթյանի, ՀՀ գլխավոր դատախազ Աղվան Հովսեփյանի, Ա նախարար Էդվարդ Նալբանդյանի,  ՀՀ մարդու իրավունքների պաշտպան Արմեն Հարությունյանի, ԵԽ անդամ-երկրների դեսպանների և միջազգային կազմակերպությունների ներկայացուցիչների հետ:

Համազեկուցողները Երևանում կհանդիպեն նաև նախկին նախագահ Լեւոն Տեր-Պետրոսյանի, հասարակական կազմակերպությունների ներկայացուցիչների, փաստահավաք խմբի նախկին անդամների, դատապաշտպանների, ազատազրկված որոշ անձանց կանանց հետ:--0--