Շիրակի մարզում երկու գյուղերի զգալի վնաս է պատճառել պտտահողմը
ԵՐԵՎԱՆ, 12 հունիսի. /Նովոստի-Արմենիա/. Շիրակի մարզում պտտահողմը զգալի վնաս է պատճառել Ղարիբջանյան և Ախուրիկ գյուղերին, «Նովոստի-Արմենիա» գործակալությանը տեղեկացրեցին հանրապետության Արտակարգ իրավիճակների նախարարությանն առընթեր Փրկարար ծառայությունից։
Հաղորդագրության համաձայն, 17։45 սահմաններում Շիրակի մարզպետարանից տեղեկություն է ստացվել այդ գյուղերում պտտահողմի մասին, և դեպքի վայր է մեկնել Ախուրյանի հրշեջ-փրկարարական ջոկատի օպերատիվ խումբը:
Տեղում պարզվել է, որ քամու պատճառով ամբողջությամբ վնասվել են Ղարիբջանյան գյուղի 13 բնակելի տան տանիքներ` 1510 քմ մակերեսով, Ախուրիկ գյուղի հիվանդանոցի տանիքը` 144 քմ և 14 բնակելի տան տանիքներ` 1850 քմ մակերեսով, ինչպես նաև պատուհանների ապակիներ:
Բացի այդ, Տրանսֆորմատորային ենթակայանի Էլեկտրական մալուխների վնասվելու պատճառով նշված գյուղերը հոսանքազրկվել են: -0-
