ՀՀ Սյունիքի մարզում սրտաբանական կենտրոն կառուցելու համար «Հայաստան» համահայկական հիմնադրամը կհատկացնի շուրջ 820 հազ. դոլար։
Ինչպես հինգշաբթի «Նովոստի-Արմենիա» գործակալությանը տեղեկացրեցին հիմնադրամի մամուլի ծառայությունից, կենտրոնը կկառուցվի Սյունիքի մարզի Գորիս քաղաքի և Ակներ համայնքի տարանցիկ գոտում, որը կլինի Հայաստանի հարավային շրջանների և Արցախի բնակչությանը սպասարկող միակ սրտաբանական բուժհաստատությունը:
Նախագծի նախնական արժեքը կազմում է շուրջ 820 հազ. դոլար, որը ստանձնել են հիմնադրամի Ֆրանսիայի տեղական մարմինը, Մարսելի «Հայաստան-Ֆրանսիա առողջապահության միությունը» (ASAF) և «Բյուշ Դյու-Ռոն» Ֆրանսիայի հարավային նահանգը: Գումարի զգալի մասը հիմնադրամին է կտակել ֆրանսահայ բարերար Գրիգոր Շահինյանը:
Հիմնադրամի Ֆրանսիայի տեղական մարմնի ատենապետ Պետրոս Թերզյանի խոսքով` Ֆրանսիայի ամենախոշոր նահանգներից մեկում կայացած այս եռակողմ համագործակցությունը ոչ միայն համախմբում է հայ համայնքին, այլ ևս մեկ անգամ փաստում հիմնադրամի վայելած մեծ վստահությունը:
Հիվանդանոցը կգործի որպես Երևանի սրտաբանական կենտրոնի մասնաճյուղ: Երկհարկանի հիվանդանոցի կառուցումը մեկնարկել է մայիսի սկզբին և ներկայումս տարվում են հողային աշխատանքները։
Հիվանդանոցը կունենա գլխավոր մասնաշենք, պոլիկլինիկա և կաթսայատուն, որը կապահովի բուժհաստատության կենտրոնացված ջեռուցումը։
Բուժհաստատությունն օրական կսպասարկի 20 ամբուլատոր այցելուի, ևս 16 հիվանդ կստանան ստացիոնար բուժում: Հիվանդանոցին հարող տարածքը կբարեկարգվի ու կկանաչապատվի:
«Երևան հասնելու փոխարեն հիվանդը կկարողանա համապատասխան բժշկական օգնություն ստանալ այս կենտրոնում, որը կապահովի մատչելի ու որակյալ բուժսպասարկում» - նշում է «Հայաստան» հիմնադրամի գործադիր տնօրեն Արա Վարդանյանը։
«Հայաստան» համահայկական հիմնադրամը ստեղծվել է 1992 թ.-ին՝ ՀՀ նախագահի հրամանով։
Գործունեության 16 տարիների ընթացքում հիմնադրամն իրագործել է Հայաստանի և ԼՂՀ զարգացմանն ուղղված 185 միլիոն դոլարի ծրագրեր։ Հիմնադրամի գործունեությունն ուղղված է Հայաստանի և Լեռնային Ղարաբաղի ենթակառուցվածքների զարգացմանը և բարեգործության խթանմանը։ Հիմնադրամի միջոցներով երկրում կառուցվել է ավելի քան 463,8 կմ երկարությամբ ճանապարհ, 211,8 կմ երկարությամբ ջրատար, 102 դպրոց, 410 բնակելի տուն, 35 բուժհաստատություն։-0-
