Սոցիոլոգիայի համաշխարհային կոնգրեսը Հայաստանում սոցիոլոգիայի ոլորտում առաջին խոշոր գիտական միջոցառումը կլինի. ԵՊՀ ռեկտոր

ԵՐԵՎԱՆ, 10 հունիսի. /Նովոստի-Արմենիա/. Հինգշաբթի բացվող Սոցիոլոգիայի համաշխարհային 39-րդ կոնգրեսը Հայաստանում սոցիոլոգիայի ոլորտում առաջին խոշոր գիտական միջոցառումն է, չորեքշաբթի լրագրողներին տեղեկացրեց Երևանի պետական համալսարանի ռեկտոր Արամ Սիմոնյանը։

«Նման խոշոր գիտական միջոցառումներ Հայաստանում շատ քիչ են անցկացվել, իսկ սոցիոլոգիայի ոլորտում առաջին անգամ են կազմակերպվում», - հայտարարեց նա։

ԵՊՀ ռեկտորն ավելացրեց, որ երբ մեկ տարի առաջ համալսարանը հրավեր ստացավ մասնակցելու Կոնգրեսի անցկացման մրցույթին, իրենք հաղթանակի հույս չունեին։ «Մենք մի քիչ զարմացած էինք, որ ԵՊՀ-ին հաջողվեց հաղթել Հնդկաստանի և Ավստրալիայի նման ահեղ մրցակիցներին», - նշեց Սիմոնյանը։

Առաջատար ուսումնասիրությունների շվեդական կոլեգիումի նախագահ և Սոցիոլոգիայի միջազգային ինստիտուտի նախագահ Բյորն Վիտրոկը հայտարարեց, որ իր համար մեծ պատիվ է, և հաճելի է անցկացնել Սոցիոլոգիայի համաշխարհային 39-րդ կոնգրեսը Երևանում։

Նա նաև ավելացրեց, որ պետք չէ զարմանալ, որ ընտրվել է Հայաստանը՝ հաշվի առնելով ԵՊՀ-ի և Հայաստանի հարուստ մտավոր և մշակութային անցյալը։
Վիտրոկը հույս հայտնեց, որ երևանյան կոնգրեսը կանցնի նույն արգասաբեր և կառուցողական մթնոլորտում, ինչպես նախորդ կոնգրեսները։

ԵՊՀ սոցիոլոգիայի ֆակուլտետի հիմնադիր, պրոֆեսոր Լյուդմիլա Հարությունյանն իր հերթին նշեց, որ Կոնգրեսը, որը կոչվում է «Սոցիոլոգիան խաչմերուկներում», կքննարկի բազմաթիվ արդի խնդիրներ, որոնք ծառացած են ինչպես Հայաստանի, այնպես էլ ողջ աշխարհի առջև։ «Այս կոնգրեսը ցույց կտա, թե ինչպես է շարժվում սոցիոլոգիան, որտեղ է այն գտնվում և ինչպիսի հեռանկարներ ունի», - նշեց նա։

Հունիսի 11-14-ն անցկացվելիք Սոցիոլոգիայի միջազգային ինստիտուտի 39-րդ համաշխարհային կոնգրեսի համակազմակերպիչներն են Երևանի պետական համալսարանը և Առաջատար ուսումնասիրությունների շվեդական կոլեգիումը: 

Կոնգրեսի ընթացքում քննարկվելու են սոցիալական գիտությունների տեսական և մեթոդաբանական նվաճումների, մարդկության առջև ծառացած արդի երկընտրանքների, գլոբալ ճգնաժամի և դրա հետևանքների ու հաղթահարման հնարավորությունների, հասարակությանը, անձին և պետությանը միտված մարտահրավերների, ժամանակակից աշխարհում դե ֆակտո պետությունների, ցանցային հասարակության առանձնահատկությունների, հետխորհրդային երկրների մոդեռնացման գործող մոդելների, ցեղասպանության, զանգվածային բռնության ու պատերազմի և արդիական այլ կարևոր խնդիրների վերաբերյալ հիմնահարցեր:  

Կոնգրեսին մասնակցելու են սոցիալական գիտությունների ակնառու ներկայացուցիչներ Իմանուել Վալերստեյնը, Միշել Վիվյորկան, Էդվարդ Թիրյաքյանը, Լև Գուդկովը, Մխայիլ Գորշկովը և վաստակաշատ այլ սոցիոլոգներ: 

 Կոնգրեսի աշխատանքներում ընդգրկված են 89 համալսարաններ և գիտահետազոտական կենտրոններ ավելի քան 50 երկրներից: Կոնգրեսը ներառելու է հարյուրից ավելի պլենար, հատուկ, թեմատիկ նիստեր և կլոր սեղաններ:-0-