Հայաստանի պաշտոնատար անձինք կարող են կատարելագործել ֆրանսերենի իրենց գիտելիքները ՀՀ ԱԳ նախարար Էդվարդ Նալբանդյանի և Հայաստանում Ֆրանսիայի արտակարգ և լիազոր դեսպան Սերժ Սմեսովի ստորագրած հուշագրի շնորհիվ։
Հուշագիրը ստորագրվել է նախօրեին Երևանում՝ Ֆրանկոֆոնիայի միջազգային կազմակերպության (ՖՄԿ) գլխավոր քարտուղարի ներկայացուցիչ Ստեֆան Լոպեզի և Հայաստանում հավատարմագրված ՖՄԿ անդամ պետությունների դեսպանների ներկայությամբ։
Ֆրանկոֆոնիայի միջազգային կազմակերպության գլխավոր քարտուղար Աբդու Դիուֆը հուշագիրը ստորագրել էր Փարիզում։
Հուշագրով նախատեսվում է 3 տարվա ընթացքում վերապատրաստել 50 հայ պաշտոնյաների` դասընթացների միջոցով կատարելագործել նրանց ֆրանսերեն լեզվի գիտելիքները։
Ծրագիրն իրականացվելու է Ֆրանսիական հանրապետության, Լյուքսեմբուրգի Մեծ Դքսության կառավարությունների և Բելգիայի ֆրանսախոս համայնքի օժանդակությամբ:
Նման հուշագիր ստորագրվել է ՖՄԿ անդամ 17 պետությունների հետ, որոնցից 15 Եվրոպական Միության անդամ երկրներ են:
Շնորհակալություն հայտնելով ՖՄԿ ղեկավարությանը և ծրագրի իրականացմանն օժանդակող պետությունների իշխանություններին՝ ՀՀ ԱԳ նախարար Էդվարդ Նալբանդյանը նշել է, որ 2008թ. կազմակերպության ասոցիացված անդամ դառնալուց ի վեր Հայաստանն ակտիվորեն մասնակցում է Ֆրանկոֆոնիայի շրջանակներում իրականացվող ծրագրերին:
ՖՄԿ գլխավոր քարտուղար Աբդու Դիուֆի անունից ողջունելով հուշագրի ստորագրումը՝ Ստեֆան Լոպեզը նշել է, որ այս ծրագրով ՖՄԿ համագործակցությունը Հայաստանի հետ որակապես նոր մակարդակի է բարձրանում, ինչը լայն հնարավորություններ է բացում Ֆրանսախոս աշխարհի հետ հարաբերությունների բնագավառում:
Նա հավելել է, որ ֆրանսերենը շարունակում է պահպանել իր դիրքերը միջազգային բեմահարթակում և մի շարք միջազգային կազմակերպություններում պաշտոնական լեզու է:-0-
