Չինաստանը սկսում է A/H1N1 գրիպի դեմ պատվաստանյութի զանգվածային արտադրությունը

Չինաստանը սկսում է A/H1N1 գրիպի դեմ պատվաստանյութի զանգվածային արտադրությունը, դեղամիջոցն արտադրվելու է երկրի 11 դեղագիտական ձեռնարկությունում՝ տարեկան 360 միլիոն չափաբաժին ծավալով, երեքշաբթի հաղորդում է «Ցզինխուա շիբաո» թերթը։

Պատվաստանյութի զանգվածային արտադրության սկիզբը թույլ կտա մինչև ընթացիկ տարվա հոկտեմբեր պատվաստել ռիսկային խմբի բոլոր ներկայացուցիչներին, գրում է թերթը, հաղորդում է «ՌԻԱ Նովոստին»։

Երեքշաբթի օրվա դրությամբ ՉԺՀ-ում A/H1N1 գրիպով հիվանդացել է 151 մարդ։ Մասնավորապես, վարակի 21 դեպք է գրանցվել Թայվանում, 41 դեպք՝ Հոնկոնգում և 68 դեպք՝ մայրցամաքային Չինաստանում։

Բարձր ախտածին վարակի տարածումը Չինաստանում մինչ այժմ կրում է «արտերկրյա» բնույթ. հիվանդացածների ճնշող մեծամասնությունը եկել է արտերկրից։ Միաժամանակ, իրավիճակը սկսվում է փոխվել՝ երկուշաբթի հիվանդացության վեց նոր դեպք է գրանցվել այն մարդկանց մոտ, ովքեր արտերկիր չեն մեկնել։ Բոլոր դեպքերը գրանցվել են Սիչուան գավառում։

Առողջապահության համաշխարհային կազմակերպությունը (ԱՀԿ) երկուշաբթի՝ հունիսի 8-ին, 73 երկրում հաստատել է A/H1N1 գրիպով մարդկանց հիվանդացության 25 հազար 288 դեպք, 139 հիվանդ մահացել է։ Ուրբաթ ԱՀԿ-ն տեղեկացրել էր 69 երկրում հիվանդացության 21 հազար 940 դեպքի և 125 մահացածների մասին։

Նախորդ շաբաթվա վերջին ԱՀԿ-ն խորհրդակցություններ է անցկացրել իր «արտակարգ կոմիտեի» փորձագետների հետ՝ աշխարհում հիվանդացության տարածման հետ կապված իրավիճակի վերաբերյալ և որոշում է ընդունել չբարձրացնել A/H1N1 գրիպի վտանգի մակարդակը մինչև առավելագույնի։

ԱՀԿ-ն ապրիլի 29-ին բարձրացրել էր A/H1N1 գրիպի վտանգի մակարդակը՝ վեցբալանոց սանդղակով 4-ից հասցնելով 5-ի։-0-