ՀՀ վարչապետ Տիգրան Սարգսյանը երեքշաբթի Մոսկվայում հանդիպում կունենա հայ ձեռներեցների հետ, հաղորդում է «Նովոստի-Արմենիա» գործակալության թղթակիցը։
ՀՀ վարչապետը երեքշաբթի մեկնել է Մոսկվա՝ կառավարությունների ղեկավարների մակարդակով կազմակերպված ԵվրԱզԷՍ-ի Միջպետական խորհրդի 23-րդ նիստին մասնակցելու։ Հայաստանը ԵվրԱզԷՍ-ի աշխատանքներին մասնակցում է որպես դիտորդ։
Հայկական պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, ՀՀ ֆինանսների նախարար Տիգրան Դավթյանը, ՀՀ էներգետիկայի և բնական պաշարների նախարար Արմեն Մովսիսյանը, ՀՀ ֆինանսների նախարարի տեղակալ Վարդան Արամյանը, ՀՀ արտաքին գործերի նախարարի տեղակալ Շավարշ Քոչարյանը և պաշտոնատար այլ անձինք:
Ծրագրվում է նիստն անցկացնել նեղ և ընդլայնված կազմով։ Ընդլայնված կազմով նիստի ընթացքում նախատեսված է ՌԴ վարչապետ Վլադիմիր Պուտինի, ինչպես նաև ԵվրԱզԷՍ-ի երկրների կառավարությունների ղեկավարների ելույթները։
Նիստի արդյունքներով կստորագրվեն համապատասխան փաստաթղթեր։ ԵվրԱզԷՍ-ի կառավարությունների ղեկավարներն ու գլխավոր քարտուղարը հանդես կգան համատեղ մամուլի ասուլիսով։
Ինչպես ավելի վաղ տեղեկացրել է «ՌԻԱ Նովոստին»՝ վարչապետների մակարդակով կազմակերպված ԵվրԱզԷՍ-ի միջպետական խորհրդին և Մաքսային միության նիստերին ծրագրվում է հաստատել Համաշխարհային ֆինանսական ճգնաժամի հետևանքների հաղթահարմանն ուղղված համատեղ միջոցառումների ծրագիրը, ստորագրել Հակաճգնաժամային հիմնադրամի ստեղծման մասին պայմանագիրը, ինչպես նաև Զարգացման եվրասիական բանկի հետ համաձայնագիրը, երկուշաբթի տեղեկացրել է ՌԴ կառավարության մամուլի ծառայությունը։
ԵվրԱզԷՍ-ի ձևաչափում (Ռուսաստան, Բելառուս, Ղազախստան, Ղրղզստան, Տաջիկստան) հանդիպման ժամանակ հիմնական ուշադրությունը կհատկացվի առևտրային և տնտեսական ոլորտներում հակաճգնաժամային հավաքական ջանքերի ակտիվացմանը։
Ինչպես նշել են Սպիտակ տան մամուլի ծառայությունից, Հակաճգնաժամային հիմնադրամի ստեղծման մասին պայմանագիրը կստորագրվի Հայաստանի մասնակցությամբ։ Զարգացման եվրասիական բանկի հետ համաձայնագիրը Հիմնադրամի միջոցների կառավարում է նախատեսում։ Նախատեսվում է, որ Հիմնադրամն իր աշխատանքը կսկսի արդեն 2009 թ.-ին։
Հիմնադրամի միջոցները կտրամադրվեն մասնակից-պետություններին ինքնավար պարտքեր և կայունացնող վարկեր տրամադրելու, ինչպես նաև միջպետական ներդրումային նախագծեր ֆինանսավորելու համար։ Ռուսաստանի մասնաբաժինը կազմում է ստեղծվող Հիմնադրամի կանոնադրական կապիտալի մեծ մասը՝ 7,5 մլրդ դոլար 10 մլրդ դոլարից։
ԵվրԱզԷՍ-ը միջազգային տնտեսական կազմակերպություն է, որն իր կազմի մեջ մտնող երկրների (Բելառուս, Ղազախստան, Ղրղզստան, Ռուսաստան, Տաջիկստան) մաքսային արտաքին ընդհանուր սահմանների ձևավորման գործառույթներ է իրականացնում, մշակում է միասնական արտաքին-տնտեսական քաղաքականություն, սակագների, գների քաղաքականություն և ընդհանուր շուկայի գործողության այլ բաղկացուցիչների քաղաքականությունը։ 2002 թ.-ից ԵվրԱզԷՍ-ում դիտորդի կարգավիճակ ունեն Մոլդովան, Ուկրաինան, իսկ 2003 թ.-ից՝ Հայաստանը։-0-
