ՀՀ կենտրոնական ընտրական հանձնաժողովը շաբաթ օրը մերժել է Երևանի Ավագանու խորհրդի ընտրությունների արդյունքներն անվավեր ճանաչելու մասին Հայ ազգային կոնգրեսի դիմումը։
Հայ ազգային կոնգրեսի կողմից ներկայացված 370-էջանոց փաստաթղթերը բողոքներ են պարունակում առանձին ընտրատեղամասերի կապակցությամբ։ Մասնավորապես, դիմորդը նշում է ընտրական հանձնաժողովների կողմից մատյանների սխալ կազմումը, նրանց մեջ հանձնաժողովների անդամների ստորագրությունների և կնիքի բացակայությունը, ինչպես նաև վստահված անձանց մատյանների հաշիվների չտրամադրումն ու առանձին տեղամասերում բողոքների չընդունումը։
Կենտրոնական ընտրական հանձնաժողովի նախագահ Գարեգին Ազարյանը նշել է, որ ԿԸՀ-ն չի հերքում, որ մայիսի 31-ին եղել են խախտումներ, սակայն դրանց մեծ մասը վերացվել է հենց քվեարկության օրը՝ ընտրական հանձնաժողովների կողմից օպերատիվ միջոցներ ձեռնարկելու միջոցով, մնացած խախտումների կապակցությամբ ընդունվել է համապատասխան որոշում և տեղեկատվությունը տրամադրվել է Գլխավոր դատախազություն։
Նրա խոսքերով, ՀԱԿ-ի կողմից ներկայացված բողոքներն ու դիմումները կազմված չեն պատշաճ կերպով և չեն կարող անվիճելի փաստ ծառայել՝ ընտրությունների արդյունքներն անվավեր ճանաչելու համար։
«370-էջանոց այս դիմումը հիմքեր չի տալիս մտածելու քվեարկության արդյունքների վրա հնարավոր ազդեցության մասին», - ասել է Ազարյանը։
Ելնելով այս ամենից՝ ԿԸՀ-ը որոշում է ընդունել մերժել ՀԱԿ-ի դիմումը, քանի որ դիմումի և նրա մեջ ներառված փաստաթղթերի մեջ չկան փաստեր, որոնք կարող էին ազդել ընտրությունների ելքի վրա։
Ազարյանի խոսքերով, ընտրություններն անվավեր ճանաչելու համար անհրաժեշտ է, որպեսզի խախտումների հետևանքներն անշրջելի բնույթ կրեն և կորսվի ընտրողների կամարտահայտության հստակ ստուգման հնարավորությունը, սակայն նման փաստեր ՀԱԿ-ը չի ներկայացրել։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Կենտրոնական ընտրական հանձնաժողովի տվյալներով՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը։
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։
Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-
