ԵՐԵՎԱՆ, 5 հունիսի. /Նովոստի-Արմենիա/. Երևանի ավագանու խորհրդի մանդատներից ընդդիմության հրաժարվելը չի կարող խոչընդոտել Խորհրդի նորմալ գործունեությանը, կարծում է հայկական ընդդիմադիր «Հանրապետություն» կուսակցության քաղխորհրդի անդամ, Հայ ազգային կոնգրեսի անդամ Սուրեն Սուրենյանցը։
Հայկական ընդդիմությունը հրաժարվել է մայիսի 31-ին անցկացված Երևանի ավագանու ընտրությունների արդյունքում ձեռք բերված բոլոր մանդատներից: Հայ ազգային կոնգրեսի առաջնորդ Լևոն Տեր-Պետրոսյանը հայտարարել է, որ «ընդդիմությունն այրում է բոլոր կամուրջները», երկխոսության չի գնա իշխանության հետ և միակ պահանջը կլինի նախագահի հրաժարականը:
«Որպես ռազմավարություն կարելի էր օգտագործել երկու միջոց (ինչպես մադատներից հրաժարվելը, այնպես էլ դրանք ընդունելը), բայց կարծում եմ, որ Երևանի ավագանու խորհրդի մանդատներից հրաժարվելը լոկալ խնդիր է, և այն գլոբալ առումով չի կարող ազդել Հայաստանում քաղաքական ճգնաժամի վրա»,- ուրբաթ լրագրողներին ասաց Սուրենյանցը։
Նրա խոսքով, քաղաքական սուբյեկտների առաջնահերթային խնդիրները շատ ավելի լայն են, քան Երևանի ավագանու խորհրդի մանդատներից հրաժարվելու կամ դրանք ընդունելու խնդիրը։
Սուրենյանցի կարծիքով, ընտրությունների հրապարակված արդյունքները ցույց են տալիս, որ ընդդիմության այդ քայլը չի կարող խոչընդոտել Ավագանու խորհրդի նորմալ գործունեությանը։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Կենտրոնական ընտրական հանձնաժողովի տվյալներով՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը։
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։
Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-
