Հայաստանի տնտեսության մեջ արված ռուսական ուղղակի ներդրումների հոսքը 2009 թ.-ին կրճատվել է գրեթե երկու անգամ՝ հասնելով 28 միլիոն դոլարի

Հայաստանի տնտեսության իրական հատվածում կատարված ռուսական ուղղակի ներդրումների հոսքը, 2008 թ.-ի առաջին եռամսյակի համեմատ, 2009 թ.-ի առաջին եռամսյակում կրճատվել է գրեթե երկու անգամ և կազմել է 28 միլիոն ԱՄՆ դոլար։

Այս մասին «Նովոստի-Արմենիա» գործակալությանը տեղեկացրեցին ՀՀ ազգային վիճակագրական ծառայությունից։

Միաժամանակ Հայաստանի իրական հատվածում կատարված ռուսական ներդրումների ընդհանուր ծավալը կազմել է 33,1 միլիոն դոլար՝ կրճատվելով 3,04 անգամ։

Վիճակագրական տվյալների համաձայն, Ռուսաստանի ներդրողներին բաժին է ընկել Հայաստանի իրական հատվածում կատարված օտարերկրյա ներդրումների ընդհանուր ծավալի 17,8 տոկոսն ու ուղղակի ներդրումների 20,1 տոկոսը։

Ռուս ներդրողներն իրենց միջոցների 86,1 տոկոսն (28,6 միլիոն դոլար) ուղղել են կապի ոլորտ, 5,4 տոկոսը (1782,4 հազ. դոլար)՝ արտադրության և էլեկտրաէներգիայի, գազի, տաք ջրի և ջեռուցման բաշխման ոլորտ, 2,8 տոկոսը (930 հազ. դոլար)՝ զբոսաշրջության, զվարճանքների կազմակերպման, մշակույթի և սպորտի ոլորտ, 2,7 տոկոսը (881,2 հազ. դոլար)՝ սպառողներին այլ տեսակի ծառայություններ տրամադրելու ոլորտ, 2,3 տոկոսը (769,2 հազ. դոլար)՝ մեծածախ և միջնորդների միջոցով իրականացվող առևտրի ոլորտ (հաշվի չառնելով ավտոմեքենաների և մոտոցիկլետների առևտուրը)։

2009 թ.-ի արդյունքներով Հայաստանում ներդրումների ծավալով Ռուսաստանը զբաղեցնում է երրորդ տեղը Ֆրանսիայից (84,2 միլիոն դոլար) և Նիդեռլանդներից (38,8 միլիոն դոլար) հետո։

Հայաստանի տնտեսության մեջ արված օտարերկրյա ներդրումների ընդհանուր ծավալը 2009 թ.-ի առաջին եռամսյակում կազմել է 186,3 միլիոն դոլար, որոնցից 139,3 միլիոն դոլարն իրական հատված կատարված ուղղակի ներդրումներն են։-0-