Մոտ ժամանակներում Հայաստանը զորակոչիկների քանակի խնդիր չի ունենա, երկուշաբթի լրագրողներին է ասել ՀՀ պաշտպանության նախարար Սեյրան Օհանյանը։
Նախարարի խոսքերով, յուրաքանչյուր տարի Պաշտպանության նախարարությունը համապատասխան միջոցներ է ձեռնարկում բանակի համալրման գործընթացը կատարելագործելու համար։ Նրա խոսքերով, զորակոչի հետ կապված հարցը քննարկվել է ՀՀ ազգային անվտանգության խորհրդի նիստի ընթացքում և գտնվում է ինչպես ՀՀ ազգային անվտանգության խորհրդի քարտուղարի, այնպես էլ նախագահի վերահսկողության տակ։
«Այս տարի մենք ևս համալրման հատուկ ծրագիր ենք կազմել, որի իրագործման ընթացքում ուշադրություն ենք դարձնելու երկու ուղղության վրա։ Առաջինը՝ զորակոչի որակի բարձրացման վրա, սկսած կցագրումից, բուժհետազոտությունից ընդհուպ մինչև զորամասերում և հավաքակայաններում բաշխման գործընթացը։ Երկրորդը՝ ուշադրություն ենք դարձնելու զորամասերում պայմանագրային զինծառայողների թվի ավելացման վրա», - նշել է նա։
Նախարարն ավելացրել է, որ աշխարհի բոլոր ուժեղագույն բանակները պրոֆեսիոնալ են, և Հայաստանի նպատակն աստիճանաբար պրոֆեսիոնալ հիմքին անցնելն է։ «Իհարկե, մենք, ելնելով ներկա իրավիճակից, չենք կարող միանգամից անցնել պրոֆեսիոնալ բանակի, մենք այժմ խառը համալրմամբ ենք գործում», - ասել է Օհանյանը։-0-
