Դուդուկի վիրտուոզ Ջիվան Գասպարյանն մոսկովյան հանդիսատեսին կներկայացնի իր թոռանը

Հայ լեգենդար երաժիշտ, դուդուկի վիրտուոզ Ջիվան Գասպարյանը երկուշաբթի Երաժշտության Մոսկվայի միջազգային տանը առաջին անգամ բեմ դուրս կգա իր թոռան՝ Ջիվան կրտսերի հետ, «ՌԻԱ Նովոստիին» հայտնել են կազմակերպիչները։ 

«Սա առաջին համերգն է, որին Ջիվան Գասպարյանը հանդես կգա իր թոռան՝ Ջիվան կրտսերի հետ, որը Գասպարյանի սանն է ու նրա դպրոցի հետևորդը, և նրա հետ կկատարի մի շարք ստեղծագործություններ»,- պատմեց «RSP-համերգ» ընկերության ներկայացուցչուհին։

Նրա խոսքերով՝ «համերգի ծրագիրը մինչև վերջ հայտնի չէ, քանի որ Ջիվան Գասպարյանը սիրում է իմպրովիզներ անել և վերջին պահին տրամադրությունից ելնելով որոշում է, թե ինչ ստեղծագործություն է կատարելու»։

«Ծրագրում ընդգրկված են մի շարք նոր նյութեր և, իհարկե, հին ստեղծագործություններ ևս։ Բանն այն է, որ Գասպարյանը վիրտուոզ է, որը որպես իր ստեղծագործությունների հիմք՝ վերցնում է հայկական ժողովրդական երաժշտությունը և մեկնաբանում այն յուրովի։ Բացի այդ, նրա ստեղծագործության մեջ առկա են բազում սեփական կոմպոզիցիաներ»,- նշել է գործակալության զրուցակցուհին։    

Նա նշել է, որ համերգը կվարի հայտնի հեռուստահաղորդավար Դմիտրի Դիբրովը։ Դուդուկի ավանդական անվանումը Հայաստանում «ծիրանափող» է, ինչը բառացի կարելի է թարգմանել որպես «ծիրանենու հոգի»։

«Հասկանալ ու լիովին զգալ, թե ինչ է դուդուկը, կարելի է գոնե մեկ անգամ այն լսելով։ Իսկ լսելով՝ ուզում ես չիմացողներին ասել, որ դուդուկի երաժշտությունը լեռների երգն է, ծառերի զրույցը, ծերունիների լացը կամ երեխաների ծիծաղը, պատերազմների աղմուկ-աղաղակը կամ հարսանիքների ուրախությունը»,- ասում է ինքը՝ Գասպարյանը ծիրանենու փայտից պատրաստված իր գործիքի մասին։ 

Ջիվան Գասպարյանը աշխարհի հայտնի երաժիշտներից մեկն է, ողջ աշխարհում վաճառվում են նրա ձայնասկավառակների միլիոնավոր օրինակներ։ Հոլիվուդի առաջատար ռեժիսորները պարբերաբար հրավիրում են Գասպարյանին լավագույն ֆիլմերի երաժշտության ձայնագրման համար։ Արևմտյան հանդիսատեսի շրջանում նա հայտնի դարձավ «Գլադիատոր» կինոֆիլմի երաժշտության ձայնագրումից հետո, որտեղ դուդուկը ներդաշնակորեն միաձուլվում է դասական սիմֆոնիկ նվագախմբի հնչողության հետ։-0-