Երևանում ընթանում են Ավագանու խորհրդի ընտրությունները

Երևանում Ավագանու խորհրդի ընտրությունների կապակցությամբ Երևանում ձևավորված բոլոր 438 ընտրատեղամասերը բաց են և ընդունելու են ընտրողներին տեղական ժամանակով ժամը 8։00-ից մինչև 20։00-ն։

Սա Երևանի պատմության մեջ առաջին Ավագանու խորհրդի ընտրություններն են։

«Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:

Երևանի Ավագանու խորհրդի ընտրություններն անցկացվում են համամասնական ընտրակարգով:

Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ 

Ճշտված ցուցակների համաձայն՝ Երևանի ավագանու խորհրդի ընտրություններին կկարողանա մասնակցել 771,5 հազար մարդ:

Ընտրություններին հետևելու են 29 տեղական կազմակերպություններ՝ 6 հազար դիտորդով և մեկ միջազգային կազմակերպություն՝ Եվրոպայի Խորհրդի տեղական և տարածաշրջանային իշխանությունների կոնգրեսը, որի կազմում ընդգրկված է 15 մարդ։

Մինչ վերջերս Երևանի քաղաքապետը նշանակվում էր ՀՀ նախագահի հրամանով։ Երևանի գործող նախագահը Գագիկ Բեգլարյանն է, ով այդ պաշտոնին է նշանակվել մարտի 4-ին՝ ՀՀ նախագահի հրամանով։ Ավագանու խորհրդի ընտրություններում Բեգլարյանը գլխավորում է իշխող Հայաստանի հանրապետական կուսակցության ցուցակը։-0-