ՀՀ ֆուտբոլի երիտասարդական հավաքականի գլխավոր մարզիչը գոհ է առաջիկա հանդիպումներին իր թիմի պատրաստության գործընթացից
Ֆուտբոլի ՀՀ երիտասարդական հավաքականի գլխավոր մարզիչ Ֆլեմինգ Սերիցլևը գոհ է առաջիկա հանդիպումներին իր թիմի պատրաստության գործընթացից։
Հայաստանի հավաքականը հունիսի 5-ին կհանդիպի Շվեյցարիայի հավաքականի հետ, իսկ հունիսի 9-ին տեղական ժամանակով 20.00-ին Վազգեն Սարգսյանի անվ. Հանրապետական մարզադաշտում կկայանա Հայաստան-Թուրքիա հանդիպումը։
«Մենք Հանրապետական մարզադաշտում մարզումներ ենք անցկացրել, ինչը հնարավորություն է տվել ֆուտբոլիստներին սեփական դաշտում զգալ խաղի կարևորությունը»,- ուրբաթ Սերիցլևն ասաց լրագրողներին։
Թիմի մարզիչը նշեց, որ առաջին երկու հանդիպումները շատ բարդ կլինեն, բայց Հայաստանի հավաքականը կանի ամեն հնարավոր բան դրական արդյունք ստանալու համար։
«Մենք ուզում ենք մի թիմ ստեղծել, որի գլխավոր հատկանիշները կայունությունն ու միասնականությունը կլինեն։ Մենք շատ մարտունակ թիմ ունենք»,- հայտարարեց Սերիցլևը։
Հայաստանի հավաքականը Թուրքիայի, Շվեյցարիայի, Իռլանդիայի, Վրաստանի և Էստոնիայի թիմերի հետ միևնույն խմբում է։
Եվրոպական բոլոր հավաքականները բաժանված են 10 նախընտրական խմբերի։ Սեփական նախընտրական խմբերի հաղթողները և երկրորդ տեղը զբաղեցրած 4 լավագույն թիմերը կխաղարկեն Եվրոպայի առաջնության 7 ուղեգրերը, որը կանցկացվի 2011 թ.-ի հունիսին Դանիայում։ -0-
