ՀՀ նախագահը պատրաստ է համաներում հայտարարել

ԵՐԵՎԱՆ, 28 մայիսի. /Նովոստի-Արմենիա/. ՀՀ նախագահ Սերժ Սարգսյանը պատրաստ է համաներում հայտարարել։

Այս մասին երկրի ղեկավարը լրագրողներին հայտնեց հինգշաբթի Սարդարապատում Առաջին հանրապետության օրվա կապակցությամբ կազմակերպված տոնակատարության շրջանակներում։

Ավելի վաղ ՀՀ խորհրդարանի խոսնակ Հովիկ Աբրահամյանը հայտարարել էր, որ նախագահը հնարավոր է՝ համաներում հայտարարի 2008 թվականի մարտի 1-ի զանգվածային անկարգությունների գործով ձերբակալվածների նկատմամբ։

«Վերջին համաներումը հայտարարվել է 2006 թվականին, և եթե երեք տարվա ընթացքում երկրում հասունացել է նոր համաներում կրրառելու գաղափարն, ապա ես պատրաստ եմ օգտվել իմ սահմանադրական իրավունքից»,- ասաց նախագահը։

Նա առաջարկեց բոլոր քաղաքական ուժերին և հասարակական գործիչներին, մասնավորապես, Հանրային խորհրդին, նախագահի նստավայր ներկայացնել իրենց առաջարկությունները համաներման անցկացման անհրաժեշտության և կարգի վերաբերյալ։

«Եթե պարզվի, որ իսկապես անհրաժեշտություն կա համաներում հայտարարելու, ես անմիջականորեն խորհրդարան կդիմեմ այդ հարցով»,- ասաց Սարգսյանը։
 
Փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։

Միասնական գործի շրջանակներում այլոց թվում քննվում են նաև ՀՀ ԱԺ պատգամավորներ Մյասնիկ Մալխասյանի, Սասուն Միքայելյանի, Հակոբ Հակոբյանի դեմ մեղադրանքները:-0-