Հայաստանում H1N1 գրիպի առումով համաճարակային իրավիճակը հանգիստ է. ՀՀ առողջապահության նախարարություն

Հայաստանում H1N1 վիրուսով հարուցված գրիպի առումով համաճարակային իրավիճակը հանգիստ է, ասվում է ՀՀ առողջապահության նախարարության մամուլի ծառայության տեղեկատվության մեջ։

«Հայաստանում շարունակվում է վարակի ներբերման և տարածման կանխարգելմանն ուղված հակահամաճարակային միջոցառումների իրականացումը: Շարունակվում է ուղևորների առողջության նկատմամբ մոնիտորինգի իրականացումը», - նշեցին մամուլի ծառայությունից։

Առողջապահության համաշխարհային կազմակերպության (ԱՀԿ) հրապարակած տեղեկատվության համաձայն՝ աշխարհում H1N1 վիրուսով հարուցված գրիպի համաճարակային իրավիճակը շարունակում է մնալ լարված։ Համաճարակը շարունակում է ընդգրկել նոր տարածքներ։ 2009թ. մայիսի 25-ի դրությամբ 46 երկիր պաշտոնական հաղորդագրություն են ներկայացրել մարդկանց շրջանում H1N1 վիրուսով հարուցված գրիպի 12.515 դեպքի մասին, որոնցից 91-ի դեպքում մահ է գրանցվել։

Մարդկանց մոտ H1N1 վիրուսով հարուցված գրիպի հիմնական ախտանշաններն են` բարձր ջերմություն, գլխացավ, մկանային ցավ, հազ, անգինա։

Հիվանդության տարածումը կանխելու նպատակով ԱՀԿ-ն կոչ է անում մարդկանց՝ մանրամասն հետևել հիգիենային, իսկ հիվանդության նախանշանների բացահայտման դեպքում անմիջապես դիմել բժիշկի։-0-