Աշխարհի պատանեկան առաջնությանը մասնակցելու համար արդեն Երևան է ժամանել 232 բռնցքամարտիկ 34 երկրից. ՀԲՖ նախագահ

ԵՐԵՎԱՆ, 22 մայիսի. /Նովոստի-Արմենիա/. Աշխարհի պատանեկան առաջնությանը մասնակցելու համար արդեն Երևան է ժամանել 232 բռնցքամարտիկ 34 երկրից, ուրբաթ լրագրողներին հայտնեց Հայաստանի բռնցքամարտի ֆեդերացիայի նախագահ Արման Մուրադյանը։

«Մասնակցության հայտ ներկայացրած 48 երկրներից արդեն ժամանել են 34 պետությունների մարզիկներ, այսօր առավոտյան և շաբաթ առավոտյան կժամանեն մարզիկներ ևս 6 երկրներից։ Ութ երկիր դեռևս չի հայտնել իր չվերթների մասին»,- ասաց Մուրադյանը։

Նա ընդգծեց, որ բոլոր տեխնիկական հարցերն արդեն լուծվել են, այսօր ավարտվում են վերջին նախապատրաստական աշխատանքները։ Ֆեդերացիայի ղեկավարը նշեց նաև, որ ժամանած թիմերն այժմ մարզումներ են անցկացնում Երևանի մարզադպրոցներում։

Իր հերթին AIBA փոխնախագահ, առաջնության տեխնիկական պատվիրակ Օսվալդո Բիսբալը շնորհակալություն հայտնեց ջերմ ընդունելության համար՝ նշելով հայկական կողմի լավ պատրաստվածությունը։ Նա հույս հայտնեց, որ նմանատիպ խոշոր մրցաշարերը Հայաստանում կանոնավոր կլինեն։

Միաժամանակ Բիսբալը զերծ մնաց Ադրբեջանի՝ առաջնությանը մասնակցելուց հրաժարվելու առիթով հայտարարություններից։ «Ես քաղաքական գործիչ չեմ, ես մարզիկ եմ»,- ասաց նա։

Միաժամանակ ՀԲՖ փոխնախագահ Դերենիկ Գաբրիելյանը նշեց, որ առաջնության մասնակցության հրավերներն ուղարկվել են բոլոր ազգային ֆեդերացիաներին ինչպես ՀԲՖ-ի, այնպես էլ AIBA-ի կողմից։ -0-