Սերգեյ Փարաջանովի անվան թատրոնի «Վրեժ կլուծեմ սիրո միջոցով» բեմադրության պրեմիերան տեղի կունենա Երևանում մայիսի 22-ին

Սերգեյ Փարաջանովի 85-ամյակին և նրա անունը կրող թատրոնի 15-ամյակին նվիրված «Վրեժ կլուծեմ սիրո միջոցով» բեմադրության պրեմիերան տեղի կունենա Երևանի Գաբրիել Սունդուկյանի անվան թատրոնում մայիսի 22-ին։   

Թատրոնի հյուրախաղերն իրականացվում են Մոսկվայում Երևանի քաղաքապետարանի ներկայացուցչության աջակցությամբ, իսկ պաշտոնական հովանավորն է Երևանի կոնյակի գործարանը։

«Մեծ կինոռեժիսորը երբեք չի զբաղվել թատրոնով և դրա հետ կապված չի եղել, բայց միաժամանակ նրա ողջ կինեմատոգրաֆը ներծծված է եղել բացառիկ թատերականությամբ և թատրոնի հանելուկով, ինչպես նաև կերպարվեստով, գեղանկարչությամբ և պոետիկայով։ Այն ամենն, ինչ կցանկանայինք մենք անել Փարաջանովի թատրոնի ժանրում, միայն հպվելն է այդ հանելուկին, որպեսզի կրկին ու կրկին ինքներս մեզ և հանդիսատեսին տանք հավերժական հարցերը գեղեցկության, հմայքի, փիլիսոփայության, մեր «ես»-ի և մեր հոգևոր էության հետ ներքին զրույցի մասին»,- չորեքշաբթի հայտարարեց թատրոնի գեղարվեստական ղեկավար, ներկայացման հեղինակ Վլադիմիր Գաբբեն բեմադրության պրեմիերիային նվիրված մամուլի ասուլիսի ժամանակ։

Նրա խոսքերով, ներկայացումը կառուցված է վարպետի երազների, նրա ստեղծած առասպելների և նախատիպերի հիման վրա։

«Հայ հանդիսատեսի հետ առաջին հանդիպումը և վարպետի հայրենիքում առաջին հանդիպումը պետք է լինի սրտաշարժ ու խորհրդանշական։ Հյուրախաղերի ժամանակ պրեմիերա խաղալը շատ դժվար է և հուզիչ, և ես կարծում եմ, որ այդ հուզմունքի մեջ կմիավորվեն թատրոնի դերասանների և ողջ կոլեկտիվի սրտերը, որպեսզի իրենց սրտի մի փոքր կտորը նվիրեն մեծ վարպետի հայրենիքին»,- հավելեց Գաբբեն։

Մոսկվայի Փարաջանովի անվան գեղարվեստական թատրոնը հիմնվել է 1994 թվականին՝ Սերգեյ Փարաջանովի 70-ամյակի տարում, «Կեցցե մաեստրոն» ներկայացումով։ Թատրոնը նվիրված է 20-րդ դարի մեծ Վարպետ ՝ Սերգեյ Փարաջանովի զարդանախշ-հոգևոր էության որոնմանը։ Թատրոնի հիմնադիրն ու գեղարվեստական ղեկավարը Վլադիմիր Գաբբեն է։ -0-