Հայ երաժիշտները «Եվրատեսիլ-2009»-ի Հայաստանի երգի ընտրությունն անհաջող են համարում

Հայ երաժիշտները կարծում են, որ «Եվրատեսիլ-2009» մրցույթին Հայաստանը ներկայացնող երգն անհաջող էր ընտրված։

«Ընտրված երգը թույլ չտվեց լիովին ներկայացնել Անուշ և Ինգա Արշակյանների հզոր վոկալ տվյալները»,- կարծում է «Չիկոն և ընկերները» ջազ-բենդի գեղարվեստական ղեկավար Արմեն Թութունջյանը։  

Ընդ որում նա նշեց, որ չնայած մրցույթի քաղաքականացված լինելուն՝ հաղթել է պարզ ու անկեղծ մի երգ Նորվեգիայի ներկայացուցիչ Ալեքսանդր Ռիբակի կատարմամբ։  

Կոմպոզիտոր Արամ Սաթյանը նույնպես նշեց երգի անհաջող ընտրությունը։ «Մենք ևս մեկ անգամ ցույց տվեցինք, որ ավելի արևելյան երկիր ենք, քան մեր հարևանները»,- նշեց նա։    

Կոմպոզիտորի կարծիքով՝ այս միտումը դրսևորվեց մրցույթում Հայաստանի դեռևս առաջին մասնակցությունից։ Ընդ որում Սաթյանն ընդգծեց, որ երգի կատարումը շատ լավ էր։ 

Նա նաև նշեց մրցույթի կազմակերպման բարձր մակարդակը, համաշխարհային աստղերի մասնակցությունն այնտեղ, մասնավորապես ճանաչված կոմպոզիտոր Էնդրյու ԼԼոյդ Վեբերի։  

Այս տարվա մրցույթի հաղթող է ճանաչվել Նորվեգիան ներկայացնող ծագումով բելառուսցի արտիստ Ալեքսանդր Ռիբակը Fairytale («Հեքիաթ») երգով։  Երկրորդ տեղը զբաղեցրեց Իսլանդիայի ներկայացուցիչ Յոհաննան, երրորդ տեղը՝ Այսել և Արաշ դուետն Ադրբեջանից։

Հայաստանը ներկայացնող Ինգա և Անուշ Արշակյան քույրերը Jan-Jan երգով «Եվրատեսիլ - 2009» մրցույթի արդյունքներով զբաղեցրել են տասներորդ տեղը:

Հայաստանը մրցույթին մասնակցում է չորրորդ անգամ։ 2008 թ.-ին երգչուհի Սիրուշոն Եվրատեսիլ-2008-ում զբաղեցրեց չորրորդ տեղը։ Սիրուշոն գերազանցեց Հայաստանի նախորդ ներկայացուցիչներ Անդրեի (2006) և Հայկոյի (2007) արդյունքները, ովքեր նախորդ մրցույթներում զբաղեցրել էին ութերորդ տեղը։ --0--