Խորվաթիայի նախագահը պաշտոնական այցով մայիսի 21-ին կայցելի Հայաստան
Խորվաթիայի նախագահ Ստյեպան Մեսիչը մայիսի 21-23-ը կայցելի Հայաստան, երեքշաբթի «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից։
«Խորվաթիայի նախագահ Ստյեպան Մեսիչի պաշտոնական այցը Հայաստան, անկասկած, վկայում է համագործակցության օրակարգն ընդլայնելու և խորացնելու երկուստեք ցանկության մասին», - երեքշաբթի ասել է ՀՀ նախագահ Սերժ Սարգսյանը՝ ընդունելով Հայաստանում Խորվաթիայի նորանշանակ դեսպան Վեսնա Ցվյետկովիչ-Կուրելեցի (նստավայրը` Աթենք) հավատարմագրերը։
«Կողմերը համակարծիք են եղել, որ այցը լուրջ խթան կլինի քաղաքական երկխոսության ակտիվացման և տարբեր ոլորտներում փոխշահավետ համագործակցության համար», - նշեցին մամուլի ծառայությունից։
Զրույցի ընթացքում Սարգսյանն ասել է, որ Հայաստանը հետաքրքված է հայ-խորվաթական բարեկամական հարաբերությունների խորացմամբ։
Սերժ Սարգսյանը երկու երկրների միջև տնտեսական կապերի աշխուժացման տեսանկյունից առաջնահերթ կարևորություն է տվել անհրաժեշտ իրավապայմանագրային դաշտի ձևավորմանը:
Զրուցակիցներն անդրադարձել են նաև հայ-խորվաթական հնարավոր փոխգործակցությանը Եվրամիության նախաձեռնությունների` Արևելյան գործընկերության և ԵՄ Սևծովյան ծրագրերի շրջանակում:
Հանդիպման ընթացքում ՀՀ նախագահը գոհունակություն է հայտնել միջազգային տարբեր կառույցներում տարածաշրջանի խնդիրների նկատմամբ Խորվաթիայի դրսևորած հավասարակշիռ դիրքորոշման համար:
Դեսպան Վեսնա Ցվյետկովիչ-Կուրելեցն իր հերթին ասել է, որ Խորվաթիան կողմնակից է Լեռնային Ղարաբաղի հակամարտության խաղաղ կարգավորմանը և սատարում է ԵԱՀԿ Մինսկի խմբի ջանքերին: -0-
