Հայաստանը շահագրգռված է Հնդկաստանի հետ բարեկամական հարաբերությունների հետագա զարգացմամբ. ԱԳՆ
Հայաստանը շահագրգռված է Հնդկաստանի հետ բարեկամական հարաբերությունների հետագա զարգացմամբ, երկուշաբթի ասել է Հայաստանի ԱԳ նախարարի տեղակալ Կարինե Ղազինյանը Հայաստանի և Հնդկաստանի արտաքին քաղաքական գերատեսչությունների հերթական խորհրդատվության ընթացքում։ Խորհրդատվության ժամանակ հնդկական կողմը ներկայացնում էր Հնդկաստանի ԱԳՆ Եվրասիայի համակարգող քարտուղար Դիվյաբ Մանչանդան։
«Ողջունելով հյուրին` ԱԳ նախարարի տեղակալը նշել է, որ Հայաստանը բարձր է գնահատում հայ-հնդկական ավանդական ջերմ ու բարեկամական հարաբերությունները և շահագրգիռ է դրանց հետագա զարգացմամբ և խորացմամբ», - «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից։
Հանդիպման ընթացքում կողմերը հանգամանալից զրույց են ծավալել տարբեր բնագավառներում փոխգործակցության ընդլայնման, նաև միջազգային կազմակերպություններում համագործակցության սերտացման վերաբերյալ։
Ղազինյանը կարևորել է քաղաքական երկխոսության ակտիվացումը և տնտեսական ու մշակութային համագործակցության խորացման նպատակով անհրաժեշտ քայլերի ձեռնարկումը։-0-
