Ադրբեջանը կարող է որակազրկվել որպես «Եվրատեսիլի» մասնակից-երկիր

«Եվրատեսլի-2009» մրցույթի կազմկոմիտե է ուղարկվել համապատասխան բողոք՝ պահանջելով պատժել ադրբեջանցի հեռարձակողին, հայտնում է ՀՀ նախագահի աշխատակազմի հանրային կապերի ու տեղեկատվության կենտրոնը՝ հղում անելով Հայաստանի Հանրային հեռուստատեսության քվեարկության նախագծի ղեկավար Ռուբեն Մուրադյանին։

Սրա համար առիթ է հանդիսացել այն հանգամանքը, որ «Եվրատեսիլ-2009» երգի մրցույթի հեռարձակման ժամանակ ադրբեջանական հեռուստատեսությունը ցույց չի տվել այն հեռախոսահամարը, որով կարելի էր ձայն տալ Հայաստանի մասնակցին, ինչը մրցույթի կանոնների կոպիտ խախտում է։ 

«Մրցույթի ընթացակարգի համաձայն, պատիժը կարող է լինել ինչպես տուգանքի, այնպես էլ Ադրբեջանի՝ որպես մասնակից-երկրի որակազրկման տեսքով»,- ասվում է հաղորդագրության մեջ։  

Հերթական աղմկահարույց իրավիճակին հանգեցրեց ադրբեջանական կողմի ագրեսիվ պահվածքը, որը որպես ինտրիգների հարթակ օգտագործեց անգամ «Եվրատեսիլ-2009» երգի մրցույթը։  

Չհանգստանալով քանդակագործ Սարգիս Բաղդասարայնի «Մենք ենք մեր սարերը» զուտ հայկական հուշարձանի շուրջ բարձրացրած հիստերիայից, որի արդյունքում, ի դեպ, մրցույթի եզրափակչում հեռուստադիտողները տեսան երկու այդպիսի արձան, ինչպես նաև չբավարարվելով իրանական «Բանաստեղծների դամբարան»-ը իրենց փառատոնի բացիկում ընդգրկելով, Ադրբեջանն ավելի հեռու գնաց՝ միջամտելով մրցույթի հեռարձակման գործընթացին։ -0-