«Թանգարանային գիշեր» ակցիայի շրջանակներում Երևանի բոլոր թանգարանների մուտքը շաբաթ օրն անվճար կլինի

Շաբաթ օրը Հայաստանում 5-րդ անգամ կանցկացվի թանգարանների միջազգային օրվան նվիրված «Թանգարանային գիշեր» ակցիան, «Նովոստի-Արմենիա» գործակալությանը հայտնեց ՀՀ Մշակույթի նախարարության հասարակայնության հետ կապերի բաժնի պետ Գայանե Դուրգարյանը։  

Նա հայտնեց, որ շաբաթ 18.00-24.00 իրենց դռները այցելուների առաջ կբացեն Երևանի 17 և Սյունիքի, Շիրակի, Լոռու մարզերի 6 թանգարաններ։

Դուրգարյանն ընդգծեց, որ բոլոր թանգարանների մուտքն ազատ կլինի։

Նա հայտնեց, որ բոլոր թանգարանները հետաքրքիր միջոցառումներ ու ցուցահանդեսներ են պատրաստել, որոնցից որոշները կացկացվեն առաջին անգամ։ 

Նա մասնավորապես նշեց, որ Մարտիրոս Սարյանի տուն-թանգարանում կանցկացվի Ալեքսանդր Սպենդիարյանի «Ալմաստ» օպերայի համար արված նրա դեկորացիաների ցուցահանդեսը, Ազգային պատկերասրահում չինական դեսպանատան աջակցությամբ կանցկացվի Չինաստանի ազգային փոքրամասնությունների ազգային տարազների ցուցահանդես, ՀՀ պատմության թանգարանում՝ «Նորահայտ գտածոներ Լոռի բերդի դամբարանադաշտից. Ք.ա. 10-9-րդ դարեր» ցուցահանդեսի բացում:

«Թանգարանային գիշեր» նախագիծը սկիզբ է առել 1999թ. գարնանային մի կիրակի ֆրանսիական թանգարաններում հասարակության համար անվճար «բաց դռների» օր հայտարարելու, Ֆրանսիայի մշակույթի նախարարության առաջարկով: Հայաստանում սա սկսել է անցկացվել 2005թ.-ից։ Ակցիային մասնակցում է Եվրոպական մշակույթի կոնվենցիայի 39 պետություն։

ՀՀ տարածքում ՀՀ Մշակույթի նախարարության վարույթում 49 թանգարան կա, իսկ թանգարանների ընդհանուր թիվը 100-ի հասնում։ -0-