«Նաիրիտ» քիմգործարանում տեղի ունեցած հրդեհի առթիվ քրեական գործ է հարուցվել ՔՕ երկու հոդվածների հատկանիշներով

Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ ՀՀ Քրեական օրենսգրքի երկու հոդվածների հատկանիշներով, «Նովոստի-Արմենիա» գործակալությանը տեղեկացրեց ՀՀ Ոստիկանության մամուլի ծառայության ներկայացուցիչ Արմեն Մալխասյանը։

«Քրեական գործ է հարուցվել 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով», - ասաց Մալխասյանը։

Նրա խոսքերով՝ Քրեական գործի նախաքննությունը վարում է Ոստիկանությունը։ Տարածաշրջանի կաուչուկի խոշորագույն հսկայի՝ «Նաիրիտի» պայթյունը որոտացել է տեղական ժամանակով ժամը 18:00-ի սահմաններում:

Դեպքի հատևանքով մահացել է չորս մարդ, տուժել է 17 փրկարար: Կրակը հանգցնում էր 27 մարտական հաշվարկ։  Դեպքի վայրում աշխատում են քննչական մարմինների ներկայացուցիչները:

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-