ՀՀ ԱԺ նախագահը բարձր է գնահատում Հայաստանում Բրազիլիայի առաջին դեսպանի գործունեությունը

ՀՀ ԱԺ նախագահ Հովիկ Աբրահամյանը բարձր է գնահատել Հայաստանում Բրազիլիայի առաջին դեսպան Ռենատե Ստիլլեի գործունեությունը՝ Հայաստանում իր առաքելությունն ավարտելու կապակցությամբ, հաղորդում է ՀՀ ԱԺ հասարակայնության հետ կապերի վարչությունը։

Զրույցի ընթացքում Հայաստանի խորհրդարանի ղեկավարը շնորհակալություն է հայտնել Ստիլլեին անցած տարիների սերտ համագործակցության համար։

Աբրահամյանը նշել է, որ իր ուրույն ոճով դեսպանը դրեց երկկողմ համագործակցության ամրապնդման համար անհրաժեշտ հիմնաքարը:

ԱԺ նախագահը տեղեկացրել է դեսպանին, որ հայ օրենսդիրները ստեղծել են Հայաստան-Բրազիլիա բարեկամության խումբ և հույս է հայտնել, որ նմանատիպ մի խումբ կստեղծվի նաև բրազիլացի պատգամավորների կողմից:

Միաժամանակ զրուցակիցներն անդրադարձել են հայ-բրազիլական առևտրանտեսական, մշակութային, սպորտային, երիտասարդական շփումներն աշխուժացնելու հարցերին։

Ամփոփելով զրույցը` Աբրահամյանը հաջողություններ է մաղթել դեսպան Ստիլլեին իր ձեռնարկումներում և հույս է հայտնել, որ նա բարեկամական կապը մեր երկրի հետ կշարունակի դիվանագիտական առաքելությունը Երևանում ավարտելուց հետո ևս:-0-