Հայ-ամերիկյան միջկառավարական հանձնաժողովի աշխատանքային խմբի նիստը տեղի կունենա Երևանում

Երևանում չրեքշաբթի տեղի կունենա հայ-ամերիկյան միջկառավարական հանձնաժողովի աշխատանքային խմբի հերթական նիստը, երեքշաբթի «Նովոստի-Արմենիա» գործակալությանը հայտնեցին ՀՀ Էկոնոմիկայի նախարարության հասարակայնության հետ կապերի բաժնից:

Հանձնաժողովի համանախագահներն են. հայկական կողմից` ՀՀ էկոնոմիկայի նախարար Ներսես Երիցյանը,  ամերիկյան կողմից` ԱՄՆ Պետդեպարտամենտի Եվրոպական և Եվրասիական երկրներին ամերիկյան օժանդակության համակարգող Դենիել Ռոզենբլյումը:

Նիստի ընթացքում քննարկվելու են համաշխարհային ֆինանսական ճգնաժամը և Ֆինանսական ոլորտի ուժեղացման ծրագիրը, տարածաշրջանային ինտեգրման հնարավորությունները էներգետիկայի, տրանսպորտի, բնապահպանության և հեռահաղորդակցության ոլորտներում, «Հազարամյակի մարտահրավերներ»  ծրագրի իրականացման ընթացքը, ինչպես նաև երկկողմ հետաքրքրություն ներկայացնող այլ հարցեր։

Հանձնաժողովի կազմում են ՀՀ և ԱՄՆ պետական գերատեսչությունների ղեկավարներ, պաշտոնատար այլ անձինք:

Նիստին  հրավիրված են ՀՀ պետական մարմինների, Հայաստանում ԱՄՆ դեսպանության և միջազգային կազմակերպությունների ներկայացուցիչներ: Նիստի արդյունքներով կստորագրվի արձանագրություն։ -0-