ԵՐԵՎԱՆ, 11 մայիսի. /Նովոստի-Արմենիա/. ԵԱՀԿ ՄԽ Ղարաբաղյան կարգավորման հարցով համանախագահներ Բեռնար Ֆասյեն (Ֆրանսիա), Մեթյու Բրայզան (ԱՄՆ) և Յուրի Մերզլյակովը (Ռուսաստան) երկուշաբթի կոչ են արել Ղարաբաղյան հակամարտության կողմերին կատարել 15 տարի առաջ կնքված հրադադարի պայմանները։
«15 տարի առաջ Հայաստանի և Ադրբեջանի առաջնորդները համարձակ և հեռատես որոշում ընդունեցին՝ ԶՈՒ հրամանատարներին կարգադրելով Լեռնային Ղարաբաղում անհապաղ ու անժամկետ հրադադարի համաձայնագիր կնքել»,- ասվում է ԵԱՀԿ ՄԽ համանախագահների հայտարարության մեջ՝ տարածված Լեռնային Ղարաբաղում հրադադարի ռեժիմի հաստատման 15-ամյա տարեդարձի կապակցությամբ։
«Լեռնային Ղարաբաղում ռազմական գործողությունների դադարեցումը կատարյալ չի եղել, և ամեն տարի հակամարտության կողմերը ճակատի գծում կյանքեր են կորցնում։ Մենք անկեղծորեն հույս ունենք, որ խաղաղ կարգավորումը, որի ձեռքբերման համար այսօր աշխատում են կողմերը, թույլ կտա նոր սերունդներին ապրել Հայաստանում, Ադրբեջանում ու ԼՂՀ-ում՝ չտեսնելով պատերազմի սարսափները»,- նշել են միջազգային միջնորդները։
Նրանք կոչ են արել հակամարտության կողմերին կատարել հրադադարի մասին համաձայնագրի դրույթները, այսինքն՝ 1995 թ.-ի «Լեռնային Ղարաբաղի հակամարտության մեջ հրադադարի ռեժիմի ամրապնդման առաջարկությունները», ինչպես նաև 2008թ.-ին Հելսինկիի նախարարական համաժողովում ճակատի առաջին գծից դիպուկահարների հեռացման մասին ՄԽ համանախագահների արած առաջարկը։
Համանախագահները հույս հայտնեցին, որ Հայաստանի և Ադրբեջանի գործող առաջնորդները կկարողանան հաղթահարել ղարաբաղյան հակամարտության համալիր պատճառներն ու բարդ հետևանքները և տարածաշրջանի ժողովուրդների համար ստեղծել անվտանգության, վստահության, համագործակցության և արդյունավետ շփման մթնոլորտ՝ թույլ տալով նրանց խաղաղությամբ ապրել՝ որպես լավ հարևաններ:
«Մենք նաև հույս ունենք, որ առաջնորդներին կհաջողվի Մինսկի խմբի համագործակցության մեջ վերջնականապես հաստատել խաղաղ կարգավորման հիմնարար սկզբունքներ»,- ասված է միջնորդնեի հայտարարության մեջ:-0-
