Պրահայում Հայաստանի և Ադրբեջանի նախագահների հանդիպման ժամանակ քննարկումներն ընթացել են Լեռնային Ղարաբաղի կարգավիճակի շուրջ. ՀՀ ԱԳՆ

Պրահայում Հայաստանի և Ադրբեջանի նախագահների հանդիպման ժամանակ քննարկումները հիմնականում ընթացել են Լեռնային Ղարաբաղի կարգավիճակի շուրջ, ասել է ՀՀ ԱԳՆ մամուլի և տեղեկատվության վարչության լրատվամիջոցների հետ կապի բաժնի վարիչ Տիգրան Բալայանը՝ մեկնաբանելով լուրերն այն մասին, թե նախագահների հանդիպման ժամանակ քննարկվել է Լեռնային Ղարաբաղի Պաշտպանության բանակի վերահսկողության տակ գտնվող տարածքներից զորքերի դուրսբերման հարցը:

«Ս.թ. մայիսի 7-ին Պրահայում Հայաստանի և Ադրբեջանի նախագահների միջև կայացած հանդիպմանը տարածքներից դուրս գալու հարց ընդհանրապես չի քննարկվել: Քննարկումները հիմնականում ընթացել են Լեռնային Ղարաբաղի կարգավիճակի շուրջ, և դա բնական է, քանի որ դա արցախյան հիմնախնդրի կարգավորման կենտրոնական հարցն է»,- ԱԳն-ից մեջբերում են Բալայանի խոսքերը:

Ղարաբաղյան հակամարտությունը սկսվել է 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-