ԵՐԵՎԱՆ, 4 մայիսի. /Նովոստի-Արմենիա/. ՀՀ Ազգային ժողովի պաշտպանության, ազգային անվտանգության և ներքին գործերի հանձնաժողովի ղեկավար, ՀՅԴ պատգամավոր Արթուր Աղաբեկյանը երկուշաբթի հրաժարականի դիմում է ներկայացրել, ՌԻԱ Նովոստինն են հաղորդել ՀՀ խորհրդարանի մամուլի ծառայությունից։
Աղաբեկյանը հրաժարվել է նաև ՆԱՏՕ-ի Խորհրդարանական Վեհաժողովի հայկական պատվիրակության ղեկավարի պաշտոնից։ ՀՅԴ-ն ապրիլի 27-ին լքել է Հայաստանի քաղաքական կոալիցիայի շարքերը՝ Հայաստանի և Թուրքիայի միջև հարաբերությունների բարելավման ուղղությամբ ծագած տարաձայնությունների պատճառով։
Մարտի 21-ին Հայաստանում ձևավորվել էր նոր իշխող կոալիցիա, որի մեջ ՀՅԴ-ից բացի, ընդգրկվել էին Հայաստանի հանրապետական կուսակցությունը, «Բարգավաճ Հայաստան» և «Օրինաց երկիր» կուսակցությունները։
ՀՅԴ-ի՝ կոալիցիայից դուրս գալու հայտարարությունից հետո կուսակցության ներկայացուցիչները գործադիր և օրենսդիր իշխանությունում զբաղեցրած բոլոր բարձր պաշտոններից հրաժարվելու դիմում էին ներկայացրել։ Այդ պաշտոնների թվում են երեք նախարարական պորտֆելները՝ գյուղատնտեսության, կրթության և գիտության, աշխատանքի և սոցիալական հարցերի նախարարների, ինչպես նաև խորհրդարանի փոխխոսնակի, խորհրդարանական երկու՝ արտաքին հարաբերությունների, ինչպես նաև պաշտպանության, ազգային անվտանգության և ներքին գործերի մշտական հանձնաժողովների ղեկավարների պաշտոնները։
Իշխող կոալիցիան դաշնակցականներին առաջարկեց պահպանել երկու խորհրդարանական հանձնաժողովների ղեկավարների պաշտոնները։ Արտաքին հարաբերությունների ղեկավար Արմեն Ռուստամյանն ընդունեց առաջարկը, իսկ պաշտպանության, ազգային անվտանգության և ներքին գործերի հանձնաժողովի ղեկավար Արթուր Աղաբեկյանը հրաժարվեց առաջարկից։
Հայ հեղափոխական դաշնակցությունը հայկական ամենահին կուսակցություններից է, որը հիմնադրվել է 1890թ.։Կուսակցությունը հանդիսանում է Սոցինտերնի անդամ։
ՀՅԴ Հայաստանի ներկայացուցչությունը ունի 7 հազար անդամ, իսկ կուսակցության արտասահմանյան մարմիննեում կա մոտ 25 հազար մարդ։
Չորրորդ խորհրդարանում ՀՅԴ խմբակցությունը ներկայացնում են 16 պատգամավորներ, իսկ ՀՀ կառավարությունում կուսակցությունն ուներ երեք նախարարական պորտֆել։-0-
