Հայաստանում ամենատարածված անուններն են շարունակում մնալ Միլենան ու Նարեկը

ԵՐԵՎԱՆ, 4 մայիսի. /Նովոստի-Արմենիա/. Ամենատարածված անունները Հայաստանում շարունակում են մնալ Միլենան ու Նարեկը, երկուշաբթի «Նովոստի-Արմենիա» գործակալությանը հայտնեցին Ազգային վիճակագրական ծառայությունից (ԱՎԾ)։

ԱՎԾ տվյալներով, 2008 թվականի ընթացքում երկրում ծնվել է 41 հազար 185 մանուկ, որոնցից 19 հազար 104-ը՝ աղջիկ, մնացածը՝ տղաներ։ «Հաշվետու ժամանակահատվածում նորածիններից 817-ին տրվել է Միլենա, իսկ 1012 տղաներին՝ Նարեկ անունները»,- ասվում է հաղորդագրությունում։ 2007 թվականին 869 աղջիկ ստացել է Միլենա, և 930 տղա՝ Նարեկ անունները։

Վիճակագրական տվյալների համաձայն, Միլենա անունն արդեն մի քանի տարի անընդմեջ մնում է առավել տարածվածը, քան այնպիսի ավանդական հայկական անուններ, ինչպիսիք են Անին (710 նորածին), Անահիտը (604), Մարիամը (425), Լիլիթը (396) և Գայանեն (332)։ Առավել տարածված անունների տասնյակում են նաև Էլենը (763), Աննան (514) և Մերին (433)։

Հաճախ են հանդիպում նաև ինչպես հայկական ավանդական անունները՝ Լուսինեն, Գոհարը, Հասմիկը, Անուշը, Արևիկը, Լիանան, Լուսինեն, Արմինեն, Կարինեն, Աստղիկը, Վարդուհին, Տաթևիկն ու Նարեն, այնպես էլ «էկզոտիկ» անունները՝ Անգելինա, Մոնիկա, Սյուզաննա, Վիկտորյա, Դիանա, Նելլի և Սոֆի։

Նորածին տղաների անունների թվում, բացի Նարեկից, ամենատարածվածների հնգյակում են Դավիթը (912 նորածին), Էրիկը (736) և Հայկը (644), այստեղ կարելի է ընդգրկել նաև Արման անունը (596)։

Բացի այդ, 2008 թվականին 516 տղայի տրվել է Արթուր, 496-ին՝ Տիգրան, 562-ին՝ Գոռ, 471-ին՝ Արմեն և 492-ին՝ Սամվել անունները։

Հատկանշական է, որ ծնողները նախընտրում են իրենց նորածին տղաներին կոչել բուն հայկական անուններով՝ Աշոտ, Արամ, Վահե, Սարգիս, Արսեն, Լևոն, Հովհաննես, Հարություն, Անդրանիկ, Վարդան, Վահագն և Հակոբ, թեև ժամանակակից Հայաստանում մանուկներին հաճախ տրվում են նաև Էդգար, Ալեն, Ալեքս, Ալբերտ, Համլետ, Միքայել և Սերգեյ անունները։ -0-