ԵՐԵՎԱՆ, 24 ապրիլի./Նովոստի–Արմենիա/. ԱՄՆ նախագահ Դոնալդ Թրամփը հանդես է եկել հայտարարությամբ 1915թ.–ին Օսմանյան կայսրությունում տեղի ունեցած ողբերգական իրադարձությունների կապակցությամբ։
Թրամփի հայտարարությունը հրապարակվել է Սպիտակ տան կայքում։
ԱՄՆ նախագահներն ավանդաբար ապրիլի 24–ին դիմում են հայ ժողովրդին` կարեկցանքի և աջակցության խոսքով։ Սակայն նրանց ելույթում «ցեղասպանություն» եզրույթը փոխարինվում է «ջարդեր», «մեծ եղեռն» ձևակերպումներով։
Загружается новость ... "Лево"
«Այսօր մենք միանում ենք համաշխարհային հանրությանը, որպեսզի հարգենք Մեծ Եղեռնի ժամանակ զոհվածների հիշատակը, որը 20–րդ դարի ամենասարսափելի զանգվածային չարագործություններից է։ Սկսած 1915թ.–ից մեկուկես միլիոն հայեր տեղահանվեցին, կոտորվեցին կամ մահվան երթի դատապարտվեցին։ Հիշատակի այս օրը մենք հարգանքի տուրք ենք մատուցում նրանց, ովքեր կորցրեցին իրենց կյանքը, միաժամանակ վերահաստատում ենք մեր հանձնառությունը ամրապնդելու ավելի մարդասեր ու խաղաղ աշխարհը», – նշվում է հայտարարության մեջ։
Թրամփի խոսքով, ամեն տարի ապրիլի 24–ին ամերիկացիներն անդրադառնում են ամերիկացի և հայ ժողովուրդների միջև ամուր կապերին։
«Մենք հպարտ ենք 1915թ․ Հայկական և սիրիական օգնության ամերիկյան կոմիտեի հիմնադիրների հսկայական ջանքերով, որոնք կարևորագույն մարդասիրական օժանդակություն տրամադրեցին հայ փախստականներին։ Շնորհակալ ենք հազարավոր ամերիկացիներին, որոնք իրենց ներդրումը կատարեցին` օգնություն ցուցաբերելով սեփական տներից արտաքսված հայերին։ Այս օրը ողբերգության լույսի ներքո մենք ականատես ենք լինում նաև հայ ժողովրդի ուժին ու ամրությանը: Երջանիկ ենք, որ շատ հայեր իրենց հարուստ մշակույթը բերեցին դեպի մեր ափեր և այդքան մեծ ներդրում ունեցան մեր երկրի կյանքում՝ լինելով զինվորներ, նշանավոր արտիստներ, անվանի ճարտարապետներ և հաջողակ գործարարներ», – նշվում է հայտարարության մեջ։
Նա նշել է, որ ԱՄՆ–ն ողջունում է հայերի և թուրքերի ջանքերը ճանաչելու և հաշվի նստելու իրենց ցավալի պատմության հետ։
«Այս օրը մենք մեր պարտքն ենք համարում հիշել նրանց, ովքեր տառապել է ու զոհվել և վերահաստատում ենք մեր նվիրվածությունը` պաշտպանելու խոցելի կրոնական և էթնիկ փոքրամասնություններին ամբողջ աշխարհում», – նշվում է Թրամփի հայտարարության մեջ։–0–
