Քոչարյան. Հայաստանի իշխանություններն արդեն կատարել են Թուրքիայի առաջադրած երեք նախապայմանները հարաբերությունների կարգավորման համար

ԵՐԵՎԱՆ, 27 դեկտեմբերի./Նովոստի–Արմենիա/. Հայաստանի իշխանություններն արդեն կատարել են Թուրքիայի առաջադրած երեք նախապայմանները հարաբերությունների կարգավորման համար, հայտարարեց ՀՀ երկրորդ նախագահ, «Հայաստան» ընդդիմադիր դաշինքի ղեկավար Ռոբերտ Քոչարյանը։


Նա հայտարարեց, որ երեք նախապայման Թուրքիան միշտ դրել է Հայաստանի առաջ․ Ադրբեջանի տարածքային ամբողջականությունը՝ ներառյալ Ղարաբաղը, յոթ շրջանի անվերապահ վերադարձը, Ցեղասպանության ճանաչման հարցը պատմաբաններին փոխանցելը, հիմա ևս մեկն է ավելացել՝ Զանգեզուրով միջքանցքի նախապայմանը։

«Հիմա ոչ թե յոթ շրջանն է վերադարձվել՝ այլ նաև բոնուսով՝ Շուշին և Հադրութը, Ցեղասպանության հարցը ամբողջությամբ թողել են Հայ դատի գրասենյակների վրա», – ասաց Քոչարյանն այսօր ասուլիսի ժամանակ։

Անդրադառնալով Թուրքիայի երրորդ նախապայմանին, որը վերաբերում է Ադրբեջանի տարածքային ամբողջականությանը` Քոչարյանը հիշեցրեց, որ Հայաստանի առաջին դեմքը ասում է, որ 2016 թվականից տեսական տարբերակ չկա Ադրբեջանի կազմից դուրս Ղարաբաղի համար։

«Հիմա երեք նախապայմաններն էլ կատարվել են, և երբ ասում են, թե Թուրքիայի հետ պատրաստ ենք բանակցել առանց նախապայմանների, ավելի մեծ երեսպաշտություն դժվար է հորինել։ Դուք երեք պայմաններն էլ կատարել եք՝ մի բան էլ ավելի», – ասաց Քոչարյանը։–0–