Հարավային երկաթգծի վերականգման հարց քննարկվում է. փոխվարչապետը՝ ապաշրջափակման տարբերակների մասին

ԵՐԵՎԱՆ, 27 հոկտեմբերի./Նովոստի–Արմենիա/. Տարածաշրջանի տրանսպորտային և տնտեսական կապերի ապաշրջափակման հարցով եռակողմ աշխատանքային խմբի շրջանակում քննարկվում է հարավային երկաթգծի վերականգնման հարցը: 

«Արմենպրես»-ի հաղորդմամբ՝ այս մասին ասել է ՀՀ փոխվարչապետ Մհեր Գրիգորյանն ԱԺ-ում կառավարության անդամների հետ հարցուպատասխանին՝ անդրադառնալով  «Հայաստան» խմբակցությունից Արթուր Խաչատրյանի հարցին:

«Մենք եռակողմ աշխատանքային խմբի  աշխատանքները կազմակերպում ենք հունվարի 11-ի հայտարարության բովանդակության շրջանակներում, այդ հայտարարության բովանդակությունից դուրս չենք գալիս»,- ասել է Գրիգորյանը:

«Երկաթգիծ, այո քննարկվում է: Հարավային երկաթգծի վերականգնման հարց քննարկվում է , ճանապարհ՝ ոչ, չի քննարկվում, որովհետև վերականգնելու բան չկա, այնտեղ ճանապարհ չի եղել»,- ասել է փոխվարչապետը:

Նա շեշտել է՝ խոսքը ապաշրջափակմանն է վերաբերում՝ դասական իմաստով, այսինքն՝ գործող ենթակառուցվածքներով հնարավորություն տալ փոխադարձ օգտագործել տարածաշրջանում բոլոր հնարավոր երկրներին:

«Ճանապարհների մասով այս պահին դեռ կոնսենսուս չունենք, առաջարկները շատ են, բայց ասել, որ արդեն կա պատրաստի քարտեզ՝ ավտոճանապարհների մասով, թե, որոնք են շահագործվելու իմ ասած սկզբունքներով, դեռևս չկա ընդհանուր հայտարարություն, ընդհանուր ընկալում: Երկաթգծի մասով ավելի ընդհանուր մոտ պատկերացումներ, մոտեցումներ կան: Բայց այդտեղ կարծում եմ, հարցը շատ ավելի պարզ է»,-ասել է փոխվարչապետը:

Տարածաշրջանի տնտեսական և տրանսպորտային կապերն ապաշրջափակելու հարցով ստեղծվել է եռակողմ աշխատանքային խումբ, որը ղեկավարում են Հայաստանի, Ռուսաստանի և Ադրբեջանի փոխվարչապետերը:–0–