ԵՐԵՎԱՆ, 17 հունվարի./Նովոստի–Արմենիա/. Չնայած առաջին դրական ազդակներին, չարժե սպասել հայ–թուրքական հարաբերությունների արագ կարգավորման։ Այս մասին ՏԱՍՍ–ին ասել է Ռուսաստանի գիտությունների ակադեմիայի Պրիմակովի անվան համաշխարհային էկոնոմիկայի և միջազգային հարաբերությունների ազգային հետազոտական ինստիտուտի Հետխորհրդային հետազոտությունների կենտրոնի ավագ գիտաշխատող Ստանիսլավ Պրիտչինը։
Загружается новость ... "Лево"
Մոսկվայում հունվարի 14–ին տեղի է ունեցել Հայաստանի և Թուրքիայի հատուկ ներկայացուցիչներ Ռուբեն Ռուբինյանի և Սերդար Քըլըչի առաջին հանդիպումը։
«Չեմ կարծում, թե այստեղ կլինի փոխգործակցության արագ վերականգնում, չափազանց շատ դժվարություններ են եղել Անկարայի և Երևանի հարաբերություններում։ Երկու կողմից չափազանց շատ նախապայմաններ են բանակցությունների համար։ Հարաբերությունները կզարգանան քայլ առ քայլ», – ասել է փորձագետը։
Նրա խոսքով, առաջին հանդիպման արդյունքում դեռ նույնիսկ հայտարարությունները բավականին զգուշավոր են։ Այդ պատճառով չարժե ունենալ չափից մեծ սպասումներ, որ հարաբերությունները կհաջողվի արագ կարգավորել։
Պրիտչինն ուշադրություն է դարձել այն փաստին, որ բանակցություններն անցկացվում են Թուրքիայի և հատկապես Հայաստանի հասարակության խիստ ուշադրության ներքո։ Երևանում ոչ բոլորն են գոհ վարչապետ Նիկոլ Փաշինյանի վարած քաղաքականությունից, հատկապես` Թուրքիայի հետ հարաբերությունների կարգավորմանն ուղղված քայլերից։ Դա կարող է ստեղծել լրացուցիչ դժվարություններ բանակցային գործընթացում, կարծում է փորձագետը։
Նա խորհրդանշական է համարում այն, որ հանդիպումը տեղի է ունեցել Մոսկվայում։ Դա ցույց է տալիս, որ բանակցությունները Ռուսաստանի և Ադրբեջանի նախագահներ Վլադիմիր Պուտինի և Իլհամ Ալիևի ու Նիկոլ Փաշինյանի` 44–օրյա պատերազմի արդյունքում ընդունված համատեղ հայտարարության կատարման շարունակությունն են։
«Խորհրդանշական է, որ այս ամենը տեղի է ունենում Մոսկվայում։ Մի կողմից, դա հնարավորություն է տալիս Հայաստանին ունենալ Ռուսաստանի աջակցությունը։ Հասկանալի է, որ Հայաստանն ու Թուրքիան անհամադրելի են տնտեսական առումով։ Ամեն դեպքում Հայաստանին անհրաժեշտ է ինչ–որ քաղաքական աջակցություն։ Եվ այն, որ հանդիպումն անցկացվեց Ռուսաստանում, ևս պլանի մի մասն է, որպեսզի Ռուսաստանը լինի հարաբերությունների կարգավորման միջնորդ և օգնի պահպանել այդ թվում Հայաստանի շահերը», – եզրափակել է Պրիտչինը։–0–
