ԵՐԵՎԱՆ, 7 ապրիլի. /Նովոստի-Արմենիա/. Իրավիճակը Լեռնային Ղարաբաղում հեռու է կայուն լինելուց: Ինչպես փոխանցում է ՏԱՍՍ-ը, այդ մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը:
«Անշուշտ, իրավիճակը դեռ հեռու է կայուն լինելուց: Ուստի պարզապես հնարավոր չէ կանգ առնել ձեռք բերվածի վրա, և ոչ ոք չի պատրաստվում կանգ առնել», - նշել է Կրեմլի ներկայացուցիչը:
ԼՂՀ ՊԲ տորաբաժանումները կանխել են հակառակորդի հետախուզադիվերսիոն գործողության երկու փորձ. ԼՂՀ ՊՆ>>
Պեսկովի գնահատականով, եթե խոսենք իրավիճակի մասին ընդհանուր առմամբ, ապա «կարելի է հետընթաց» արձանագրել: «Մինչ թեժ բախումների վերսկսումը շատ դրական քայլեր էին կատարվել կարգավորման ուղղությամբ: Սակայն այժմ հետընթաց տեղի ունեցավ, ևբազմաթիվ հարցերում ստիպված կլինենք լրացնել բաց թողածը», - եզրափակել է Պուտինի մամուլի քարտուղարը:
Բացի այդ, Պեսկովը հայտարարել է, որ Մոսկվան կշարունակի աջակցել Լեռնային Ղարաբաղում հակամարտության խաղաղ կարգավորման գործընթացին: «Անշուշտ, այս անգամ ևս, կրակը դադարեցնելու համար տարբեր մակարդակների վրա տարվել է բավական օպերատիվ և մեծ աշխատանք: Գործընթացի կողմերը արդեն իսկ նշել են Ռուսաստանի այդ ջանքերը: Իհարկե, Մոսկվան կշարունակի իր հետևողական գիծը», - նշել է նա:
Երևանը մեկնաբանել է Լավրովի խոսքերը ԼՂ հակամարտության կարգավորման` «սեղանի վրա գտնվող» պայմանավորվածությունների մասին>>
Կրեմլի ներկայացուցիչը հիշեցրել է, որ Ռուսաստանը Մինսկի խմբի համանախագահ է, և հակամարտության հենց սկզբից մեծ ջանքեր է գործադրել և գործադրում հակամարտության խաղաղ կարգավորման ապահովման հարցում:
«Ռուսաստանը բարիդրացիական, գործընկերային հարաբերություններ է պահպանում թե´ Երևանի, թե´ Բաքվի հետ: Բացի այդ, մենք օգտագործում ենք այդ հարաբերությունները վերոնշյալ պայմանների ստեղծման համար` աշխատելով ինչպես երկկողմանի հիմքերով, այնպես էլ` միջազգային մեխանիզմների շրջանակում», - բացատրել է Պեսկովը:
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։ Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա, 6 անօդաչու սարք։ Ադրբեջանական զինուժը տվել է 300-ից ավելի մարդկային կորուստ:
Հայկական կողմը կորցրել է 14 տանկ, ունի 33 զոհ, մոտ 121–ը վիրավոր է, անհետ կորած է համարվում 25–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–