ԵՐԵՎԱՆ, 29 դեկտեմբերի./Նովոստի-Արմենիա/. Լեռնային Ղարաբաղում ռուս խաղաղապահները ստուգելու են Հադրութի շրջանում կրակոցների մասին տեղեկատվությունը, հայտնում է ՏԱՍՍ-ը՝ հղում անելով ՌԴ Պաշտպանության նախարարությանը:
ՌԴ ռազմական գերատեսչության տվյալներով՝ հրադադարի ռեժիմը գործում է շփման գծի ողջ երկայնքով:
«Կողմերի հաշտեցման կենտրոնը ստուգում է տեղեկատվությունը Հադրութի շրջանի Տող բնակավայրի տարածքում 2020 թվականի դեկտեմբերի 27-ին ավտոմատ հրաձգային զենքի հնարավոր օգտագործման մասին», - հայտնում են ՌԴ ՊՆ-ից:
Գերատեսչությունից հիշեցնում են, որ դեկտեմբերի 28-ին տեղի ունեցավ գերիների հերթական փոխանակումը: Ռուսաստանի օդատիեզերական ուժերի ինքնաթիռը Բաքվին գերեվարված երկու ադրբեջանցի է փոխանցել: Բացի այդ, չորս հայ գերիներ վերադարձվել են Հայաստան:
Հիշեցնենք, որ դեկտեմբերի 27-ի լույս 28-ի գիշերը ադրբեջանական մի շարք լրատվամիջոցներ հայտնում են Հադրութի Տող գյուղի մոտակայքում հայ և ադրբեջանցի զինվորականների միջև վերսկսված մարտերի մասին։ Հաղորդվում է նաև երկու կողմի զոհերի և վիրավորների մասին: ՀՀ ՊՆ–ից, սակայն, հայտնում են, որ Տող գյուղը գտնվում է ադրբեջանական ԶՈՒ ամբողջական վերահսկողության ներքո։ Արցախի ՊԲ-ն խստորեն պահպանում է հրադադարի ռեժիմը, որևէ ստորաբաժանում տվյալ հատվածում որևէ գործողության չի մասնակցել, ավելին՝ Արցախի ՊԲ ստորաբաժանումների հետ կապված որևէ արտակարգ միջադեպ չի գրանցվել։ -0-